Бангладешийн нийслэл Дакка хотын нэгэн ресторан руу зэвсэгт этгээдүүд дайран оржээ. Тэд наад зах нь 20 хүнийг барьцаалж, тус ресторанд бүгсэн байна.

 

Цагдаа нар мэдэгдэхдээ "буудалцааны үеэр 2 цагдаа амиа алдаж, 30 орчим хүн шархадсан” гэв.

Уг халдлага өчигдөр орой Дакка хотын Гулшан дүүрэгт болсон бөгөөд цагдаа нар болон зэвсэгт этгээдүүдийн хооронд буудалцаан болжээ.

Үйлчлүүлэгчид болон рестораны ажилчдыг зэвсэгт этгээдүүд барьцаалсан байна. Барьцаалагдсан хүмүүсийн дунд гадаадын иргэд байгаа гэсэн мэдээлэл байна.

Дакка хотын тус дүүрэгт ЭСЯ-д болон гадаадын компаниудын оффисууд байдаг аж. Мөн гадаадын олон иргэн тус дүүрэгт амьдардаг байна.

Зэвсэгт этгээдүүд "Лалын улс” бүлэглэлтэй холбоотой бололтой.

Бангладешт лалын хэт давруу үзэлтнүүд халдлага үйлдэх нь нэмэгдсээр байгаа юм. Тиймээс цагдаа нар лалын хэт давруу үзэлтнүүдийг дарах ажиллагааг эрчимжүүлж байгаа билээ.

Г.Доржханд

Монцамэ