Дэндүү гэмээр дэндүү харамсалтай хэргүүд олон гарах юм. Учир мэдэхгүй нялх үрсдээ анхаарал халамжаа сул тавьсаны уршгаар үр хүүхдээсээ хагацаж өнчирч үлдэх өрөвдөлтэй эмгэнэлтэй үйл явдлууд болсоор байна. Бүхэл бүтэн нэг айлын элэг бүтэн амьдрал хагасарна гэдэг дэндүү харамсалтай.

Бүр тодруулбал, ах дүүс, эгч дүүс усанд осолдож амиа алдах хэрэг гарсаар байна. Өнгөрсөн сард гэхэд Өвөрхангай аймагт нэг айлын гурван хүүхэд хар худганд унаж амиа алдсан хэрэг гарсан бол мөн Улиастай Хужирбуланд нэг айлын хоёр хөөрхөн дэрсхэн охин усанд живж амиа алдсан.

Түүнчлэн Говь-Алтай аймгийн Бигэр суманд бөөрний сувилалд амрахаар аав ээжтэйгээ очсон хоёр хүүхэд тогтоол усанд живж амиа алдсан гэх мэт олон хэргүүд ар араасаа цуварсаар байна. Тэгвэл өнгөрсөн амралтын өдрүүдэд дахин ийм харамсалтай хэрэг гарчээ.

Нэг айлын хоёр хүү усанд осолдож живж амиа алдсан харамсалтай гэмээр харуусалтай хэрэг цагдагийн байгууллагад бүртгэгджээ. Тодруулбал, БЗД-12 "Төмөр замын Том холбох гэх газрын тогтмол усанд хүн нас барсан байна” гэсэн мэдээллийг авч шалгахад БЗД-12 хороонд суух Т.Э /эр.06н/, Т.Э /эр.09н/ нар живж нас барсан байжээ. Хүүхдүүд тоглож байгаад хөл алдсан бололтой гэдгийг эх сурвалж хэлж байна. Энэ хэргийг цагдаагийн байгууллагаас үргэлжлүүлэн шалгаж байна. Ийм харамсалтай гэмээр хэргүүд гарсаар байна. Арван сар тээж төрүүлсэн алдрай бяцхан үрсээ үер усны аюулд алдана гэж хэн санах билээ дээ. Тиймээс эцэг эхчүүд минь ээ, амарч зугаалж явахдаа, мөн бага насны хүүхдүүдээ хараа хяналтгүй гэрт нь орхихдоо ядаж хажуу айлынхандаа захиж үлдээх хэрэгтэй. Мөн болзошгүй аюу эрсдлийг байнга анхааруулж сануулж болгоомжлуулж байгаач дээ, эцэг эхчүүдээ. Хэн хэн нь хаана хаана болгоомж сэрэмжээ өндөр байлгахыг цагдаагийн байгууллага болон онцгой байдлын албанаас онцгойлон анхааруулж байна.

О.Сайхан