Өнөөдөр Нью-Дели хотноо тус улсын үндэсний томоохон баяруудын нэг болох Тусгаар тогтнолын өдрийг тэмдэглэж байна. Энэтхэгийн Дотоод явдлын яамнаас мэдээлснээр, террорист халдлага гарч болзошгүй явдлаас сэргийлэн Нью-Дели хотын гудамжуудад 50 мянга гаруй эргүүлийн цагдаа нар ажиллаж байгаа аж.

Ялангуяа ёслолын гол арга хэмжээ зохион байгуулагдах 17-р зууны архитектурын дурсгалт газар болох Улаан цайзын хамгаалалтад онцгой анхаарал хандуулж байгаа гэнэ. 70 жилийн өмнө ерөнхий сайд агсан Жавахарлал Неругийн анх тогтоосон уламжлалын дагуу түүхт цамхгийн орой дээр төрийн далбаа мандуулж, хүндэт харуул жагсан өнгөрсний дараа төрийн тэргүүн ард түмэндээ хандан үг хэлдэг юм байна.

Энэ онцгой бүс газрыг аюулгүйн албаны 15 мянган ажилтан найман давхар бүсэлж, ойр орчимд нь 500 гаруй видео камер суурилуулжээ. Ойролцоох өндөр барилгууд дээр мэргэн буучдыг байршуулсан аж. Улаан цайзын дээгүүр зөвхөн цагдаагийн нисдэг тэрэг болон нисгэгчгүй төхөөрөмжөөс өөр зүйл нисэхийг өдрийн турш хориглосон байна.

Д.Мөрөн