-Та "Рио”-гийн олимп эхлэхийн өмнө "Би заавал ялалт байгуулах болно” гэж мэдэгдсэн. Та өнөөдөр амласандаа хүрч, олимпийн аварга боллоо?

-Тиймээ. Би Лондонгийн олимп дуусаад л "Рио”-гийн олимпийн бэлтгэлдээ гарсан. Би "Рио”-гийн олимпоос медаль хүртэхийг хүссэн. Зорилгоо биелүүлсэндээ баяртай байна.

-Таны зорилго зөвхөн олимпийн аварга уу?

-"Рио”-гийн олимпод оролцох эрхээ авсан бүх тамирчин олимпийн аварга болохыг хүсч, бэлтгэл сургуулилтаа хийдэг. Мэдээж хэрэг ялагдах гэж олимпод оролцохгүй байх. Хэрвээ надад цааш явах итгэл бас зориг байвал би амжилтаа шинэчлэн байгуулсаар байх болно.

-100 метрийг 9.81 секунтэд туулж, "Рио”-гийн анхны алтан медалиа хүртсэн. Та энэ төрөлд гурав дахь олимпийн алтан медалиа хүртлээ. Сэтгэгдэл ямар байна?

-Уралдахаасаа өмнө өмнөх амжилтаа бага зэрэг ахиулахыг хүссэн. Гэхдээ энэ удаад амжилтаа ахиулж чадсангүй. Сэтгэл санаа тийм ч муу биш байна. Учир нь би зорилгоо биелүүлж, алтан медалийн эзэн боллоо. Дараагийн тэмцээндээ л анхаарлаа хандуулах хэрэгтэй байна.

-Та Рио хотноо ирэхдээ алтан медалийн эзэн болно гэдгээ урьдчилан мэдэж байсан уу?

-Үгүй ээ. Би маргааш, нөгөөдөр юу болохыг мэдэхгүй. Британийн гүйлтийн тамирчин Мо Фарах хүртэл шигшээ уралдаанд гүйж байхдаа унана гэдгээ мэдэхгүй байсан. Тиймээ надад ч гэсэн юу тохиолдохыг би мэдэхгүй байна. Гэнэт шөрмөс минь татах зэрэг гэнэтийн үйл явцууд надад тохиолдохыг би мэдэхгүй. Маргааш юу болохыг би таашгүй.

-Мо Фарах унах үед ямар мэдрэмж төрсөн вэ?

-Их л гайхсан. Тэрбээр зогсолгүй дахин уралдаж, тэр тусмаа түрүүлэхэд бахархах сэтгэл төрсөн. Тамирчин хүн ялагдаж болно. Гэхдээ та зорилгоосоо буцаж болохгүй. Ялагдсан ч замаа дуусга. Ялагдсан ч соёлтой дэвжээнээс бууж сур. Миний сэтгэл их хөдөлсөн учир Фарахыг медалиа гардан авах үед түүний гараас барьж, ямар агуу зориг тэвчээр гаргасан болохыг нь хэлэхийг хүссэн.

-Та гурван олимпод оролцлоо?

-Хүн өөрийгөө сайн сонсох хэрэгтэй. Юу хийвэл амжилт гаргах вэ гэдгээ өөрөө олж мэдэх хэрэгтэй.

-Та 29 настай. Зодог тайлах талаар бодож байна уу?

-Олимп дуусаагүй байна.

-Бразил улсад өрнөж буй олон асуудлаас болж таныг энэ удаагийн олимпод оролцохгүй хэмээн хэвлэлийнхэн мэдээлж байсан?

-Гэхдээ би ирчихсэн байна.

-Өчигдрийн финалыг зургийг та үзсэн үү. Таны инээж буй зураг интернэтийг шуугиулж байна?

-Мэдээж хэрэг. Сэтгэл минь их хөдөлсөн байсан.

-Нэг л өдөр зодог тайлах талаар бодох байх. Дараа нь хэрхэх вэ?

-Тиймээ, нэг л өдөр энэ талаар бодох байх. Зодог тайлаад би уралдааны замаа их санахаа л мэдэж байна. Миний баяр, гуниг бүхэн энэ зам дээр өнгөрсөн.

-Таныг цуцашгүй гэдэг?

-Үгүй дээ. Би ч гэсэн алдаа гаргаж, медальгүй үлдсэн олон тэмцээн уралдаан бий. Би алдаа гаргах бүртээ өөртэйгөө их удаан ярилцдаг. Миний хамгийн сайн зөвлөх бол дотоод хүн минь.

Б.Дэлгэрцэцэг