ОХУ-ын төрийн тэргүүн Владимир Путины хөрөг зураг болон "энх тайвныг тохинуулагч” гэсэн бичиг бүхий асар том баннер зургийг  өчигдөр Нью-Йорк хотын Манхэттэний гүүрнээс өлгөсөн байжээ.

 

Манхэттэн болон Бруклин дүүргийг холбодог Нью-Йоркийн гол гүүрнээс өлгөсөн уг зураг дээр Оросын төрийн далбаагаар дэвсгэр хийгээд В.Путины хөрөг зургийг байрлуулсан байв.

Хэн тавьсан нь тодорхойгүй нууцлаг энэ баннер зураг тэр даруй нийгмийн сүлжээнүүдээр таржээ. 

Цагдаа нар уг зургийг төд удалгүй хураан авчсан байна. Хэн үүнийг өлгөснийг олж тогтоохоор мөрдөн шалгаж байгаа аж.

Сүүлийн үед Вашингтон болон Москвагийн харилцаа таарамж муутай байгаа билээ.

Америкийн Ардчилсан нам кибер халдлагуудад өртсөнийхөө дараа "ерөнхийлөгчийн сонгуульд хөндлөнгөөс оролцож байна" гэж ОХУ-ыг буруутгах болсон юм.

Мөн тус хоёр улсын зуучлалаар байгуулсан Сирид гал зогсоох хэлэлцээр өнгөрсөн сараас хэрэгжиж эхэлсэн боловч ердөө долоо хоногийн дараа байлдааны ажиллагаа дахин эрчимжиж эхэлсэн.

Вашингтон энэ долоо хоногийн эхээр мэдэгдэхдээ "Москва хүлээсэн үүрэг амлалтаа биелүүлэхгүй байгаа учир Сирид гал зогсоох тохиролцоог сэргээх асуудлаар ОХУ-тай хэлэлцээ хийхээс АНУ түдгэлзэж байна” гэсэн билээ.