УИХ-ын гишүүн, ЗГХЭГ-ын дарга Ж.Мөнхбатын халаасандаа гараа хийж гадны хүмүүстэй зураг авхуулсан ёозгүй зураг цахим ертөнцөд олны анхааралд өртөөд байна. 

Тэрбээр Францын Гадаад хэрэг, Олон улсын хөгжлийн сайд Жан-Марк Эрогийн урилгаар Парис хотноо болсон "Нээлттэй засгийн түншлэл” олон улсын түншлэгчдийн хуралд оролцоод ирсэн юм. 70 гаруй орны төр, засгийн тэргүүн, сайд, парламентын гишүүд, оролцсон өндөр дээд түвшний уулзалтад ЗГХЭГ-ын дарга, Монгол Улсын сайд Ж.Мөнхбат гараа халаасандаа хийгээд, олон улсын сайд нартай хээв нэг гар барин зогсож буй зураг шүүмжлэл дагуулж байна.

Гараа халаасандаа хийх, бохь зажлах зэргийг дипломат ёс, олон улсын өндөр дээд хэмжээний уулзалт байтугай жирийн нэг төрийн байгууллагын ажилтнуудад ч хориглодог жижиг журам. Тэгвэл улсын сайд хүн дипломат ёсонд харш, бүдүүлэг үйлдэл гаргаад явж буйд ямар хариуцлага, зэмлэл хүртээх ёстой вэ. 

Ж.Мөнхбат сайдын энэхүү ажлын айлчлал нь цаашид хоёр орны төсөл, ажлуудыг урагшлуулах, үр дүнтэй хамтын ажиллагаа хөгжүүлэхэд чухал ач холбогдолтой гэж Гадаад харилцааны яам дүгнэж буй. Харин халаасандаа гараа хийн зогсох Монгол Улсын сайд, Монгол Улсыг олон улс хэрхэн дүгнэсэн нь эргэлзээтэй.