Сүхбаатар аймгийн Эрдэнэцагаан сумын нутаг дахь Бичигт боомтоор олон тооны адуу БНХАУ руу гаргах гэж хүлээж байсныг олон нийтэд мэдээлснээр амьдаар нь хил давуулахгүй гэсэн шийдвэр гаргаж, ихэнхийг нь Улаанбаатар руу зөөж авчирсан. Гэвч хятадууд амьдаар нь гаргах сонирхолтой байгаа бололтой, 130-аад адуу тус боомтын дэргэд хашаатай байгааг орон нутгийн эх сурвалжууд мэдээллээ.

Адууг худалдан авсан хятад эзэд нь боомтын ойролцоо хашаа түрээсэлсэн бөгөөд маллаж байсан залуу цалин мөнгөө өгөхгүй болохоор нь орхиод явсан гэнэ. Тиймээс эзэд нь адуугаа бэлчээж чадахгүй удаан хашсанаас болж морьд улдаж, туурай нь элэгдэн гишгэж явахад хүндрэлтэй болоод буй талаар иргэд санаа зовнин ярьж байна.

Адуу монгол хүн ойртохоор үүрсэн дагаж буй нь өрөвдмөөр байна хэмээн орон нутгийн эх сурвалжууд мэдээллээ. Хилээр амьд адуу гаргахгүй гэсэн шийдвэр гаргачихаад байхад тэнд 130-аад агт байлгаж буй нь хардлага төрүүлж байгаа юм.