Монголын боксын спортын өнөөгийн хөгжил, тамирчдын амжилт, дасгалжуулагчдын ур, чадвар аль хэдийнэ дэлхийн хэмжээнд хүрч олимпийн наадамд Монголчууд өндөр амжилт гаргадаг болсон билээ. Үүний тодхон жишээ нь сүүлийн гурван олимп дараалан ширэн бээлийтэнүүд медаль зүүсэн явдал юм. Хүнд хэцүү тулааны спортод дурлаж түүнийхээ төлөө өөрийнхөө амьдралыг бүрэн зориулж яваа олон олон дасгалжуулагчийн нэг нь Т.Ганзориг. "Ихэр бээлий" клуб байгуулж түүнийхээ төлөө бор зүрхээрээ зүтгэн яваа Т.Ганзориг багшийн нэг өдрийг хэрхэн өнгөрдөг талаар манай сайт та бүхэндээ толилуулж байна.

1. Түүхэн амжилтын эзэд болж, эх орныхоо нэрийг олимп, дэлхийд цуурайтуулж яваа тамирчдыг бид бүгд шагшин магтдаг ч, тэднийг бага балчираас нь бэлтгэж, амжилтад хүргэсэн олон шилдэг дасгалжуулагчдыг бид мартаж боломгүй. Тэрбээр хүүхэд байхаасаа л боксын спортод дурлаж, энэхүү спортын үнэнч дэмжигч нь болсон. Тэрээр боксын спортод өөрийн хувь нэмрээ оруулах хүсэлдээ хөтлөгдөн 2012 оноос дасгалжуулагчийн курст суун их спортдоо томоохон зорилго тавин эргэн ирсэн юм. Түүний боксын ажлын анхны гараа "Ширэн бээлий" клуб байж Д.Төрбат дасгалжуулагчийн туслахаар ажилласан нь түүнд асар их туршлага, тамирчид бэлтгэх ухаан суулгаж өгчээ.

2. Т.Ганзориг багш "Ихэр бээлий" клубээ анх 2015 оны есөн сард байгуулжээ. Өдгөө түүний клубт 40 орчим хүүхэд дөрвөн ээлжээр хичээллэдэг аж. Байгуулагдаад жил хагас орчим болж буй ч гэсэн түүний дасгалжуулсан хүүхдүүд хэдийнэ томоохон амжилт гаргаж багшийгаа баярлуулж эхэлсэн байна. 2016 онд л гэхэд түүний бяцхан шавь нар өсвөрийн тэмцээнүүдээс 33 медаль хүртсэн бол энэ он гараад эхний дөрвөн сард л 33 медаль хүртсэн амжилттай. Хамгийн сүүлд гэхэд л Өвөрхангай аймагт болсон өсвөр үеийн УАШТ-ээс 6 тамирчинтай оролцож хоёр Алтан медаль зүүгээд ирсэн байна. Энэхүү тэмцээн нь ирэх наймдугаар сард Филиппин улсад зохиогдох Ази тивийн АШТ-д оролцох тамирчдыг сонгон шалгаруулах тэмцээн байсан ба түүний хоёр шавь Э.Сүхбат, Б.Алтантулга нар энэхүү тэмцээнд алтан медаль хүртэж, эх орноо төлөөлөн оролцох болзолыг хангасан байна.

3. "Ихэр бээлий" клуб монгол гуравдугаар сургуулийн ард 22 байрны доод давхарт байрлах аж. Хэдийгээр уг байр ашиглалтанд ороод удаж байгаа ч Т.Ганзориг багшийн хүүхдүүдийн амжилт энэхүү газраас л гараагаа эхэлжээ. Тэрбээр 22-р байрны "Манай хөрш" СӨХ-нд талархаж явдагаа дахин дахин илэрхийлж байсан. Учир нь тус байрны оршин суугчид болон СӨХ тэднийг дэмжин энэхүү байрныхаа доод давхартаа үнэ төлбөргүй байлгадаг юм байна. Тэрбээр олон шавьтай ч гэсэн төлбөр төлөөд хичээллэх боломжтой айлын хүүхэд цөөн гэнэ. Мөн Т.Ганзориг багш хүүхдүүдийнхээ тэмцээн уралдаанд явах зардал мөнгө, хэрэгсэл тоног төхөөрөмж, бусад зардалыг өөрөө л зохицуулдаг ажээ. Уг байрны оршин суугчид хүүхдүүдийн төлөө өөрийгөө зориулан буй багш болон ирээдүйн аваргууд болохоор тэмүүлж буй бяцхан хүүхдүүдийн амжилтаар бахархах цаг тун удахгүй ирэх буй за.

4. Уг клуб байрныхаа багтаамж болон хүүхдүүдийнхээ боломжоос шалтгаалж өдөрт дөрвөн ээлжээр хичээллэдэг. Өглөө 10 цагаас л эхлээд үдшийн 22 цаг хүртэл Т.Ганзориг багш ганцаараа хүүхдүүдийнхээ бэлтгэлийг хийлгэнэ. Энэ олон хүүхдүүдтэй ганцаараа өдөржин бэлтгэл хийлгэхдээ тэрбээр ядардаг ч гэсэн, өөрийн хайртай спортынхоо төлөө ядарч зүдрэх, саад бэрхшээл тохиолдохыг юман чинээ үл тооно. Өөрөө бээлий өмсөөд хүүхдүүдээ ЛАФ цохиулах нь энгийн хүнд бол тийм ч хүсмээр ажил биш. Өдөржин ганцаараа энэ олон хүүхдүүтэй ажиллахаар "Ядардаг уу" гэсэн асуултанд "Хүүхдүүд гэдэг чинь сайхан энергитэй, тэдэнтэйгээ хамт байж, амжилтанд хүрч, өдрөөс өдөрт өөр хүн болж байгааг харахаар Ядрах гэдэг зүйлийг мартдаг юм" хэмээн хариулсан.

5. Т.Ганзориг багш гурван хүүхэдтэй. Хоёр ихэр хүүтэй болсондоо билэгшээн клубээ "Ихэр бээлий" хэмээн нэрлэжээ. Нэр хэмээх зүйл тухайн хүний хийж буй зүйлтэйгээ холбоотой байдаг учраас түүний шавь нар медалийг хос хосоор нь авчирдаг болжээ. Өөрөө өдөржин хүүхдүүдтэй бэлтгэл хийдэг болохоор энэ айлын амьдралыг түүний хань нь хувиараа хөдөлмөр хийн авч явдаг аж.

6. Олон хүүхэд бужигнасан "Ихэр бээлий" хэмээх энэ клубт одоо ивээн тэтгэгч маш их хэрэгтэй байгаа юм байна. Хэдийгээр Т.Ганзориг багш бор зүрхээрээ зүтгэдэг ч бүхнийг өөрөөсөө гаргаад явах нь түүнд мэдээж амаргүй байгаа. Ялангуяа гадаад руу хүүхдүүд нь тэмцээн уралдаанд явахад зардал өндөр болохоор санхүүгийн асуудал энэ клубийн хамгийн том асуудал болоод байна. Бэлтгэл хийх танхим, ринг, бээлий, мешок, хүчний бэлтгэлийн тоног төхөөрөмжүүд түүнд хангалттай байх юм бол Ирээдүйн олимп дэлхийн аваргууд энэ клубт бэлэн байна. Гадаад руу олон улсын тэмцээнд анх удаагаа оролцох гэж буй хүүхдүүд нь анхныхаа томоохон тэмцээнд амжилт гаргахын төлөө, өдрийн бодол шөнийн зүүд болон явж байгаа гэнэ. Тэмцээнд оролцох эрхээ аваад аав ээжийгээ байнга гуйсаар гадаад паспортоо гаргуулан, багшдаа авчирч өгчээ. Ийм учраас Т.Гантулгад багшид хоёр шавиа их алдарынх нь оргил өөд тэмүүлэхэд нь дэмжээд өгөх боксод элэгтэй хөгжөөн дэмжигчид маш их хэрэгтэй байгаа ажээ.

7. Бяцхан хүүхдүүдэд эрдэм боловсрол олгох үүрэг нь энэ хорвоогийн хамгийн том өглөг билээ. Хүүхдүүдийн амьдралд насан туршид нь эрдэм ухааныг хайрласан багш нь юутай ч зүйрлэшгүй том өглөгч байдаг тул "Багш байх - Хүн байх" амаргүй. Нэгэн насны амьдралаа зөвхөн шавь нарынхаа төлөө зориулж буй багш хүний буян заяа мөнхөд оршдог тул энэхүү удаагийн нийтлэлээ үүгээр өндөрлөе.

Багш таны Алдар мөнхөд бат оршиг ээ.

Ч.Амар