"Рио Тинто” группын гүйцэтгэх захирал Сэм Уолш ням гарагт буюу энэ сарын 29-нд Монгол Улсад ирнэ. Энэ үеэр тэрбээр Хятадын хилээс 80 км-ийн зайд байрлах Говийн бүс нутагт орших уурхайд зочлон, ажилчидтай уулзах аж.

Түүнчлэн Оюу Толгой төсөлтэй холбоотой асуудлаар Ерөнхий сайд Ч.Сайханбилэг зэрэг Засгийн газрын эрх баригч, гишүүдтэй уулзалт хийнэ гэж нэрээ нууцалсан эх сурвалжийг иш татан AFR мэдээллээ.

Сэм Уолш "Рио Тинто”-гийн гүйцэтгэх захирал хувиараа хийж буй анхны айлчлал юм.

Оюу Толгойн далд уурхайн санхүүжилтийн асуудал гацаанд ороод хэдэн жилийн нүүр үзэж байгаа. Тус төслийн хөрөнгө оруулалт зогсонги байдалд орж үүнтэй холбоотойгоор Монгол улсад орж ирэх гадаадын хөрөнгө оруулалт саарч, улмаар зогсоход нөлөөлсөн.

Зарим шинжээчид Монголын хөрш БНХАУ-д эдийн засгийн өсөлтийн хурд саарч байгаа зэрэг олон хүчин зүйлтэй холбогдуулан Ерөнхий сайд Ч.Сайханбилэгийн Засгийн газар дээрх асуудлаар Рио Тинтотой зөвшилцөлд хүрэхийг эрмэлзэж байгаа гэж үзэж байна.

"Сайханбилэгийн Засгийн газар Оюу Толгойн хэлэлцээ хийх Рио Тинтогийн хамгийн сайн боломж юм" гэж брокер диллерийн BDSec компанийн Улаанбаатар дахь салбарын Үйл ажиллагаа эрхэлсэн захирал Ник Козайн ярьжээ.

Энэ талаар Оюу Толгой компаниас тодруулахад "Сэм Уолш энэ долоо хоногийн сүүлчээр Монголд ирнэ. Оюу Толгой компани 1 сая дахь тонн зэсийн баяжмалаа үйлдвэрлэсэн тэмдэглэлт арга хэмжээнд оролцохоор ирж байгаа. Энэ үеэр бизнесийн хүрээний зарим нэг төлөөлөгчтэй уулзана" гэв.