Тажикстаны нийслэл Душанбе хотод өчигдөр /IX.15/ хуучин ЗХУ-ын бүрэлдэхүүнд байсан улсуудын аюулгүй байдлын асуудлаар дээд хэмжээний чуулган боллоо. Чуулганы үеэр ОХУ-ын Ерөнхийлөгч Владимир Путин Сири дэх хямралын асуудлаар үзэл бодлоо илэрхийлжээ.

Исламын Халифат буюу ISIS бүлгийг дарахын тулд Сирийн Засгийн газартай заавал хамтрах ёстой гэж В.Путин мэдэгдээд, ОХУ Сирийн Ерөнхийлөгч Башар аль-Ассадад үргэлжлүүлэн цэргийн тусламж үзүүлнэ гэжээ.

Үүнээс нэг хоногийн өмнө ОХУ Сирийн баруун нутагт агаарын бааз байгуулахаар төлөвлөж байна гэж АНУ-ын армиас мэдэгдсэн юм. Ассадын засгийн газарт тусламж үзүүлэхгүйгээр Европ руу цуврах дүрвэгчдийн урсгалыг сааруулах боломжгүй гэж ОХУ-ын төрийн Тэргүүн үзэж байна.

Харин Пентагон энэ байр суурийг буруутгаад, Сири улсад ОХУ-ын цэргийн бааз барих нь иргэний дайныг хурцатгахаас өөр үр дүнд хүргэхгүй гэж мэдэгджээ. Сири улсад дөрвөн жил гаруй үргэлжилж буй мөргөлдөөний уршгаар 200 мянган хүн амь насаа алдаад байна.

А.Дэлгэрмаа