Дорноговь аймгийн Замын-Үүд суманд энэ сарын 2-ны өдөр алга болсон 8 настай охиныг эрж хайх ажиллагааг тус аймгийн Онцгой байдлын албаныхан болон сумын төвийн албан хаагчид уйгагүй явуулж байгаа хэдий ч одоогоор ямар нэгэн ахиц гараагүй байна.

Охиныг эрж хайх ажиллагаанд Хятадын цагдаагийнхантай хамтран ажиллах хүсэлт гарган, Эрээн хотын цагдаа нар тусалж байгаа аж. Тус хотын баруун захаас эрж хайх ажиллагааг эхлүүлсэн талаар эх сурвалжууд мэдээлж байсан.

Тэгвэл эрж хайх ажиллагааны үед хэрэгжүүлдэг бүрэлдэхүүн хэсгийн нэг болох охины аав, ээжийг шалгах явдал ерөнхийдөө дууссан бололтой. Охин алга болох өдөр эцэг, эх нь аймгийн төв рүү явсан гэх мэдүүлгийн дагуу шалгасан бөгөөд аав Д.Дашдулам нь аймаг орж ажилд бүртгүүлэхээр эхнэр Б.Хоролмаагийн хамт явсныг тэдэнтэй цуг зорчиж явсан гэрчүүд баталсан байна.

Мөн охиныг хичээлдээ хоцорч очсон учраас ангийн багш нь оруулаагүй, ингээд уг хэрэг үүдсэн мэт яриа гарч байсныг шалгахад тухайн өдөр охин сургууль руугаа огт очоогүй, ангийн багштай холбоотой яриа худал цуурхал болох нь камерын бичлэгээр тогтоогджээ. Охины сургуульд явах замд байдаг дэлгүүрийн камерт ч түүний дүрс байхгүй байгаа аж. 

Д.Мөрөн

Эх сурвалж: ZONE.MN