ДАХИАД Л ЗАСГИЙГ ОГЦРУУЛАХААР ЗЭХЭЖ ЭХЭЛЖЭЭ

Манай хуудсанд LIKE дарж нэгдэнэ үү

У.Хүрэлсүхийн Засгийн газар байгуулагдаад 100 ч хоноогүй байна. Гэтэл түүний танхимыг тараах сэм хуйвалдаан оны өмнөөс өрнөөд эхлэв бололтой. МАН доторх хагарал эвлэлдээгүйгээс дараагийн ээлжийнхэн хоолондоо орохоор засгийг бужигнуулах нь мэдээжийн хэрэг. Эрх баригчдын талцал саяхан болсон "Алтансарнай” арга хэмжээний үеэр тод харагдана лээ. МАН-ын дэргэдэх Нийгмийн ардчилал Монголын залуучуудын холбооноос шинэ оны босгон дээр уламжлал болгон зохион байгуулдаг энэхүү баярын ширээний ард фракц фракцаараа хуваагдан суусан байв. Нэг талд хотын фракцынхан буюу УИХ-ын дарга М.Энхболдыг дагагсад, нөгөө талд нь Ерөнхий сайд У.Хүрэлсүхийн хүмүүс гэх маягаар ялгарсан байлаа. УИХ-ын дарга М.Энхболд мэндчилгээний үг хэлснийхээ дараагаар арга хэмжээг орхиод гарахад нь түүний фракцынхан пирхийтэл босоод дагах нь тэр. Ёлкноос гараад У.Хүрэлсүх, М.Энхболдын бүлэглэл тус тусдаа шинэ жилээ тэмдэглэсэн гэх мэдээлэл ч дуулдав.

У.Хүрэлсүхийн эмхлэн байгуулсан Засгийн газар энэ сарын сүүлээр 100 хоногийн тайлангаа тавихаар завгүй ажиллаж байх зуур тэднийг тараах зорилготой нөхдүүд Төрийн ордноор гүйлдэж байгаа ажээ. Тэд намрын чуулган завсарласны дараа гуравдугаар сар дөхүүлээд нэлээд идэвхтэй хөдөлж эхэлнэ гэх мессэж нисгэх боллоо. Энэ дунд Д.Оюунхорол, Ж.Мөнхбат болон Ж.Эрдэнэбатын Засгийн газрыг унагахад гол үүрэгтэй оролцсон Т.Аюурсайхан, О.Батнасан, Б.Тэмүүлэн нарын нэрс цохогдож байх жишээтэй. Бялуу хүртэж чадаагүй тэдгээр гишүүн М.Энхболдын фракцынханд үйлчлэхээр шийдсэн бололтой. Үндсэн хуулинд зааснаар Ерөнхий сайд юм уу түүний танхимын гишүүдийн тэн хагас нь нэгэн зэрэг огцорвол Засгийн газар бүрэлдэхүүнээрээ огцрох учиртай. Мөн УИХ-ын гишүүдийн дөрөвний нэгээс доошгүй нь Засгийн газрыг огцруулах тухай саналыг албан ёсоор тавибал УИХ хэлэлцэн шийдвэрлэдэг заалт ч бий. Хэдийгээр У.Хүрэлсүх МАН-ын дарга болоод Ерөнхий сайдын эрх мэдлийг атгасан гэж аархаж байгаа ч улс төр яаж ч өрнөж болно. Гэхдээ мань эр бандааш хочит Д.Гантулгын бүрэн эрхийг түдгэлзүүлж оронд нь УИХ-ын гишүүн болохоор санаархаж буй нь эрсэдлээ эртнээс тооцоолсных. Хашир улстөрчийн хувьд энэ зэргийн алсын хараа түүнд байлгүй яахав.

"Хатуу мод салхинд амархан хугардаг” гэсэн дорно дахины нэг хэлц үг байдаг даа. Харин зөөлөн мод хичнээн ширүүн салхи, шуурганд нахилзаж, тахилзаж байгаад хугарчихгүй тэсээд л үлддэг. Түүгээр ч барахгүй ургаж, цэцэглэдэг шүү дээ. Хэрэв Ерөнхий сайд, МАН-ын дарга У.Хүрэлсүх хатуу мод лугаа байвал удаан оршин тогтнож чадах нь юу л бол. Уг нь тэрбээр бялхаж, бярлахсан энэ их ааг омгоо зөв ашиглаж чадсан бол өдийд намынхаа эв аяыг олчихсон байх ёстой.

Б.ЗОЛБОО

ДАХИАД Л ЗАСГИЙГ ОГЦРУУЛАХААР ЗЭХЭЖ ЭХЭЛЖЭЭ
Манай хуудсанд LIKE дарж нэгдэнэ үү
Нэр:*
И-мэйл:
Сэтгэгдэл:
Bold Italic Underline Strike | Align left Center Align right | Insert smilies Select color | Add Hidden Text Insert Quote Convert selected text from selection to Cyrillic (Russian) alphabet Insert spoiler
top