Кенийн нийслэл Найроби хотоос Кисуму хотыг зорин явж байсан зорчигч тээврийн автобус осолдсоны улмаас 50 хүн амиа алдсан тухай орон нутгийн цагдаагийн газрын төлөөлөгч мэдээлэв.

 

Амиа алдсан хүмүүсийн тоо нэмэгдэж болзошгүй учир нь осолдсон автобусанд хэдэн зорчигч гацаад байгаа юм байна. Гэмтэж бэртсэн хүмүүсийг ойролцоох эмнэлэгт яаралтай хүргэжээ.

Цагдаагийн газрын төлөөлөгчийн мэдээлснээр, автобусны жолооч анхаарал болгоомж алдсаны улмаас осол гарсан бөгөөд уг автобусанд нийт 52 хүн сууж явсан аж. Амь үрэгдэгсдийн дунд бага насны хүүхдүүд байсан гэж Кенийн олон нийтийн мэдээллийн хэрэгслүүд мэдээлж байна.

 

Кенийн хурдны замууд дээр зам тээврийн осол гарах нь түгээмэл тохиолддог бөгөөд Дэлхийн эрүүл мэндийн байгууллагын замын хөдөлгөөний аюулгүй байдлаар эрэмбэлдэг жагсаалтад Кени улс нь доогуур байр эзэлдэг юм. Өнгөрсөн оны 12 дугаар сард тус улсын Мигаа нутгийн ойролцоо ачааны тэрэг автобустай мөргөлдсөний улмаас 36 хүн амиа алдаж байжээ.