ОХУ энэ долоо хоногийн сүүлээр олон улсын усанд пуужингийн туршилт хийнэ гэж мэдэгдсэн нь НАТО-гийн цэргийн сургуулилтад нөлөөлөхгүй гэж тус эвслийн тэргүүн мэдэгдлээ.

 

"ОХУ Норвегийн эргээс холгүй пуужингийн туршилт хийхээр төлөвлөж байгаа тухай бид сонссон. ОХУ мэргэжлийн арга барилаар ажиллана гэж би найдаж байгаа бөгөөд тус улсын энэхүү үйл ажиллагаа бидний төлөвлөгөөнд нөлөөлөхгүй” гэж НАТО-гийн Ерөнхий нарийн бичгийн дарга Йенс Столтенберг мэдэгдлээ.

Ирэх сарын 1-3-ны хооронд пуужингийн туршилт хийнэ гэж ОХУ-ын агаарын тээврийн асуудал хариуцсан эрх баригчид Норвегийн иргэний агаарын тээврийн "Avinor” компанид мэдэгдсэн тухай тус улсын хэвлэлд мэдээлжээ.

"ОХУ-ын тэнгисийн цэргийн хүчин энэ бүс нутагт тогтмол цэргийн сургуулилт хийдэг. ОХУ-ын юу хийж байгааг бид сайтар ажиглах болно. ОХУ олон улсын усанд үйл ажиллагаа явуулж байгаагийн зэрэгцээ энэ үйл ажиллагаагаа тэд бидэнд хэвийн байдлаар мэдэгдсэн” гэж Йенс Столтенберг онцлон тэмдэглэв.