Олон арван хүн гэмтэж бэртсэн эмх замбараагүй байдлыг дуусгавар болгох арга замыг олохын тулд Францын Ерөнхий сайд Эдуард Филипп улс төрийн намууд болон жагсагчдын төлөөлөлтэй даваа гарагаас эхлэн яриа хэлэлцээ хийхээр болжээ.

 

Шатахууны үнийн өсөлтийг эсэргүүцсэн жагсагчидтай хэрхэн зөвшилцөх талаархи уулзалтыг Ерөнхийлөгч Эмманюэль Макрон өнгөрсөн ням гарагт зохион байгуулжээ. Э.Макрон Аргентинд болсон "Их 20”-ийн дээд хэмжээний уулзалтад оролцоод ирсэн даруйдаа жагсагчдын эвдэж сүйтгэсэн газруудад очиж, нөхцөл байдалтай танилцсан юм.

Францын Засгийн газар уур амьсгалын өөрчлөлтийн эсрэг авч хэрэгжүүлэх арга хэмжээнүүдийн хүрээнд ирэх оны нэгдүгээр сарын нэгнээс эхлэн татварыг нэмэгдүүлэхээр төлөвлөж байгаа юм. Үүнтэй холбоотойгоор өнгөрсөн сараас эхлэн Франц даяар томоохон жагсаал цуглаан өрнөх болсон билээ.

Өнгөрсөн бямба гарагт Парис хотын жагсагчид улам ширүүсч, аюулаас хамгаалах хүчний ажилтнуудын хооронд мөргөлдөөн үүсчээ. Энэ үеэр 130 гаруй хүн гэмтэж бэртсэний зэрэгцээ 400 гаруй хүнийг баривчилсан байна.