Хууль зүйн сайд Х.Тэмүүжин хэдхэн сарын өмнө Г.Сарангэрэл гэх охинтой нэр холбогдож багагүй хэл аманд өртөөд авсан. Энэ нь тухайн  үед сүр дуулиан болж амтай хэлтэй болгоны ярианы сэдэв байв. Улмаар дуулиан дундаа орж, ор дэрний асуудал яригдах үед Х.Тэмүүжин сайд "энэ бол зохиомол хэрэг, нэр бүхий хүмүүсийн над руу шидсэн чулуу” хэмээн тайлбарлаж байсан удаатай. Гэсэн ч түүнд итгэх хүн тэр үед цөөхөн байсан юм.  

Харин цаг хугацаа өнгөрөх тусам хэргийн үнэн учир бага багаар тайлагдаж байгаа бололтой. Өөрөөр хэлбэл хэний шидсэн чулуу байсан бэ? гэдэг нь тодорхой болжээ гэсэн үг.  

Тодруулбал энэ хэргийн дараахан ЦЕГ-ын дарга үүрэгт ажлаасаа чөлөөлөгдөж, доор нь ажиллаж байсан хурандаа нарыг тус газрын шинэ дарга, тэргүүн комиссар С.Баатаржав ажлаас нь халж орхив.  

Түүнчлэн өнгөрсөн баасан гарагт тэргүүн комиссар С.Баатаржав Дотоод хяналт шалгалт, аюулгүй байдлын газрыг хуралдуулж, Хууль зүйн сайд Х.Тэмүүжингийн эсрэг хөдөлсөн гэх хурандаа нар болон зарим газар хэлтсийн дарга нарыг шалгах үүрэг чиглэл өгчээ. Ингэхдээ ЦЕГ-ын дээрх хурандаа нарыг ТЕГ-аар шалгуулахаар хандсан байна. Тэдгээр хурандаа нарыг төрийн эрхийг хууль бусаар авах хуйвалдаан зохион байгуулсан байж болзошгүй хэмээн үзэж байгаа бололтой. Учир нь хурандаа нар ЦЕГ-ын дарга асан Б.Билэгттэйгээ хамтран Хууль зүйн сайд Х.Тэмүүжинг Хууль зүйн сайдын суудлаас унагахын тулд Г.Сарангэрэл охиныг ашигласан гэж тэд үзжээ.

Гэвч халагдсан дарга, хурандаа нар зүгээр суухыг хүсээгүй бололтой. Учир нь ажлаасаа халагдсан Б.Билэгт дарга Төрийн албаны зөвлөлд гомдол гаргажээ. Тэрбээр өөрийг нь хууль бусаар, ямар ч үндэслэлгүйгээр ажлаас халсан хэмээн үзэж бүх шатны хуулийн байгууллагад хандаад байгаа аж. Түүнийг нэг л өдөр салбарын сайд нь ажлаас нь чөлөөлж орных нь хүнийг томилон, тэргүүн комиссар цол олгосон юм. Б.Билэгтийг салбарынхаа сайд дээр гүйцэтгэх ажиллагаа явуулсан, хурандаа нарыг энэ ажилдаа оролцуулсан гэдэг үндэслэлээр даргын суудлаас нь буулгасан гэнэ.  

Тэгвэл өнөөдөр Г.Сарангэрэлийн өмгөөлөгч Г.Батбаяр mass.mn сайтад өгсөн ярилцлагандаа нэгэн зүйлийг онцлон дурджээ.

Тэрээр "Надад баттай эрх сурвалж хэллээ. Тэдгээр хүмүүс миний амьдралыг там болгоно, бид ажилдаа эргээд орох өдөр ирнэ, өшөөгөө авна гээд тангараг тавьж байгааг дуулсан. Тийм байж болно, гэхдээ би айхгүй байна. Би ч бас зүгээр сууж байгаад толгойгоо тасдуулах хүн биш. Надад нотлох баримт олон бий. Мөрийтэй тоглодог, хүнийг хэрэгт хэлсээр гүтгэсэн гээд олон бий. Тухайн хүмүүсийн сонирхож байсан обьект нь Г.Сарангэрэл. Хууль зүйн сайдын унагах гол шалтгаан, хүн нь энэ бүсгүй байсан. Тэр эмэгтэйг эрх ашгийг нь хамгаалж буй хүн нь би байсан. Тиймээс өөрийн эрхгүй сонирхож, ашиглах гэж оролдсон. Тэрнээс биш би өөр хүний эрх ашгийг хамгаалж байсан бол огт сонирхохгүй. Надаас өөр ямар ч өмгөөлөгч байсан тэд хандах л байсан болов уу. Энэ ажлаа хэрэгжүүлэхдээ хууль зөрчин, намайг өтнөөс дор үзсэн. Шууд л чамд эрүүгийн хэрэг үүсгэнэ, ингэж хэлүүл, тэгэхгүй бол хорино, цагдана гэсэн. Энэ нь манай эрүүгийнхний дунд байдаг ялзарсан арга нь л даа. Ардчилал гараад 20 жил болж байна, социализмийн үед хүчээр тулган шаарддаг ийм арга үеэ өнгөрөөчихөөд байхад манай эрүүгийнхэн энэ аргаасаа салахгүй байна. Цагдаагийн байгууллагад эрүүгийнхэн ноёрхож байна. Тэдний ноёрхол хэвээр байгаа цагт шинэчлэлийн талаар ярих ч хэрэггүй” хэмээжээ.

Үүнээс харахад халагдсан хурандаа нар Г.Сарангэрэлийн өмгөөлөгч Г.Батбаярыг хорхойтой шүдэндээ зуусан бололтой.

 Б.Сийлэн