Өнгөрсөн сард Шинэ Зеландын Крайстчерч хотын хоёр сүмд зэвсэглэсэн этгээд халдлага үйлдсэний улмаас 50 хүн амиа алдсантай холбогдуулан галт зэвсгийн хяналтыг чангатгах хуулийн төслийг батлах санал хураалтыг тус улсын парламент явуулжээ.

 

Лхагва гарагт Шинэ Зеландын парламент дайралтын зориулалтаар ашиглах винтов буунууд зэрэг хагас автомат зэвсгүүдийн дийлэнхийг хориглох хуулийн төслийг баталсан байна. Энэхүү төслийг 120 хууль тогтоогчийн 119 нь дэмжсэн байна.

"Галт зэвсэг тийм их хэмжээний хохирол учруулсанд итгэж чадахгүй байна. Хууль тогтоомжоор  дамжуулан олон хүний амийг аврах боломж байсан. Амиа алдсан 50 хүн үг хэлэх боломжгүй ч бид тэдний дуу хоолой болох хэрэгтэй” гэж Ерөнхий сайд Жасинда Ардерн парламентад хандан хэлжээ.

Энэхүү баримт бичгийн дагуу галт зэвсэг эзэмшигчид өөрсдийн зэвсгээ цагдаагийн газарт хүлээлгэн өгч, нөхөн олговор авах боломжтой болох ажээ. Шинэ Зеландын амбан захирагч хуулийн төслийг баталсны дараа хууль хүчин төгөлдөр хэрэгжиж эхэлнэ.

Өнгөрсөн гуравдугаар сарын 15-нд Крайстчерч хотын хоёр сүмд халдлага үйлдсэн Австралийн иргэн Брентон Таррантыг 50 хүний амийг хөнөөсөн хэрэгт буруутгаж байгаа юм.