"Boeing” компани Этиопт осолдсон "737 MAX” загварын нисэх онгоцны MCAS буюу Маневр гүйцэтгэх үзүүлэлтүүдийг сайжруулах туслах системийн туршилтыг 100 орчим удаа хийжээ. Энэ тухай  "Boeing” компанийн Ерөнхий захирал Деннис Меленберг мэдэгдсэн байна.

 

"Шинэчилсэн програм хангамжийг суулгахын тулд манай инженерүүд болон техникийн ажилтнууд АНУ-ын Холбооны агаарын тээврийн удирдлагын газар болон захиалагчидтай цөхрөлтгүй хамтран ажилласан. Энэхүү программ хангамж нь иймэрхүү осол дахин давтагдахгүй гэдгийг нотлох ёстой юм” хэмээн Меленбергийн хэлснийг "The Wall Street Journal” сонин уламжилсан байна.  

"737 MAX” загварын нисэх онгоцны нийлүүлэлтийг түр хугацаанд зогсоох тухайгаа "Boeing” компанийн төлөөлөгчид өнгөрсөн 3 дугаар сард мэдэгдсэн юм. Хожим нь тус загварын онгоцны үйлдвэрлэлийн хэмжээг бууруулах тухайгаа мэдэгдсэн. Агаарын орон зайдаа "Boeing 737 MAX” загварын онгоцны нислэг үйлдэхийг түр хугацаанд зогсоох үүргийг АНУ-ын Холбооны агаарын тээврийн удирдлагын газар мэдэгдсэний дараа компани ийм арга хэмжээ авсан юм.