Тагнуулын ерөнхий газрын дарга Б.Хурцыг баривчилсан нь энэ удаагийн ээлжит дуулиан шуугиан байв. Өчигдөр орой шүүхээс түүнийг 15 хоног үргэлжлүүлэн хорих шийдвэрийг гаргав. Магадгүй 15 хоног хорьсон болоод батлан даалтад гаргах биз.

Түүнийг гүйцэтгэх ажиллагаа болон хууль тогтоомж зөрчсөн хэргээр АТГ-т олон жил шалгаж байгаад харьяалал тогтоон цагдаагийн байгууллагын Мөрдөн байцаах алба руу ийнхүү шилжүүлж, хойшлуулашгүй арга хэмжээ авч цагдан хорьжээ.

Ер нь цагаан захтнууд буюу эрх мэдэлтэй албан тушаалтнуудыг хууль хяналтын байгууллагаас сүр дуулиантай баривчилдаг. Гэвч удалгүй батлан даалтад гаргаж, эсвэл сулалсан байдаг. Барилаа, хорилоо, суллалаа гэдэг системээр хууль хяналтын байгууллагууд ажиллаад байна уу гэж харддаг болжээ.

Прокуророос хэрэгт холбоотой этгээдүүдэд таслан сэргийлэх арга хэмжээ авах хүсэлтээ шүүхэд хүргүүлж, шүүхээс хүсэлтийг хангаж үргэлжлүүлэн хорих, суллах эсэхээ шийддэг.

Сүүлийн үед хоригдсон албан тушаалтнууд өмгөөлөгчөөрөө дамжуулан анхан шатны шүүхийн шүүгчид хүсэлт гаргаж, шүүгч хүсэлтийг нь хангаад батлан даалтад гаргадаг болов. Барьж хориод хэрэгт нөлөөлүүлэхгүйгээр, мөрдөн байцаалтад саад учруулахгүйгээр мөрдөж, шалгахгүй юм бол тэднийг барьж хорьж, цаг хугацаа барж яадаг юм бэ.

Цагдан хорихоос цаашгүй цагаан захтнуудын хэрэг замхраад өнгөрдөг.

Өнгөрсөн хугацаанд өчнөөн албан хаагчийг цагдан хорьж, удаан хугацаанд шалгалаа. Өнөөдрийг хүртэл хэнийг ч яллаж, дээлийг нь нөмрүүлж хариуцлага тооцоогүй байна.

Олонхи нь албан тушаал, авлига хээл хахуулын хэрэгт холбогдсон. Шалгагдах явцдаа гэмт хэрэг хийсэн нь илэрсэн байдаг. Гэвч цаг хугацаа хожиж, зарим нь хөөн хэлэлцэх хугацаа дууссан гээд эрүүгийн хэргээс мултарч үлдээд байна. Ард түмэн, олон нийт чихтэй, нүдтэй, санах ойтой. Гэтэл улсаа худалдаж, татварын мөнгө буюу улсын хөрөнгөөр тоглож наадсан, хувьдаа завшсан, бусдыг хохироосон гэх хэрэгт хэн нэгнийг яллалсангүй, хариуцлага ч хүлээлгэсэнгүй. Хууль шүүхийн байгууллага нь өөрсдөө эрх мэдэлтэй, эд хөрөнгөтөй хүмүүст худалдагдсан гэж муулуулж шүүмжлүүлж байна. Тийм ч байж магадгүй, олон нийт хардах эрхтэй.

Энгийн иргэдэд хатуу хорвоо, эрх баригчдад зөөлөн хорвоо болчихоод байна. Сайд асангуудыг урт хугацаанд шалгаж байна. Батлан даалтад байгаа хүмүүс гадуур зугаалж, олон улсын хурал чуулганд оролцож яваа харагдах юм. Нөгөө хавтаст хэрэг хаачив.

"Эрдэнэт” үйлдвэрийг олон улсын банкинд барьцаанд явж их хэмжээний мөнгө идэж уусан Ш.Батхүү тэргүүтэй эрх баригчдын хэрэг юу болов, яав.

Худалдаа хөгжлийн банкны удирдлагуудыг сүр дуулиантай цагдан хорьсон. Хэрэг ямар шатандаа явна.

Ерөнхий сайд асан С.Баяр, Ч.Сайханбилэг нарын хэрэг юу болов. Эдгээрийг асууж сураглахаар АТГ-аас "Хэргийг шалгаж байгаа, мөрдөн байцаалтад байна. Прокурорын зөвшөөрөлгүй дэлгэрэнгүй мэдээлэл өгөх боломжгүй. Эдийн засгийн гэмт хэрэг учраас их цаг хугацаа орно” гэсэн жижүүрийн хариултаас өөр юу ч хэлдэггүй.

Эхнээсээ хэргээ замхруулж, шинэ албан тушаалд очиж, хохирогч болсон этгээддээ хэдэн зуун саяар нь хахууль өгч тохиролцож, гомдлоо татаж авсан байна.

Хууль хүчний байгууллага хуудуутай хэн нэгний тоглоом шоглоом болохгүй ёсгүй юм. Буруутай нь тогтоогдсон бол хариуцлага хүлээх ёстой. Хэргээ хаацайлж дундаа орж, дур зоргоороо аашилдаг албан тушаалтнуудад хатуу хариуцлага хэрэгтэй байна. Хууль дүрэм гэж цагаан цаасан дээр хараар бичсэн хууль байдаг юм бол түүнийгээ энэ эрүүгийн хэрэгт холбогдсон эрх баригчдад үзүүлж, хуулийн дагуу хариуцлага тооцдог байхыг хүсч байна.