Америкийн Зүрхний Ассоциацаас хүнд өдөрт шаардлагатай эслэгийн хэмжээг гаргасан бөгөөд 1000 калори тутамд 14 грамм эслэг шаардлагатай гэжээ. Тэгвэл насанд хүрсэн хүмүүс хоол хүнснээсээ өдөрт дунджаар 2000 калори авдаг гэж үзвэл 25-28 грамм эслэг идэх хэрэгтэй.  Насны ангиллаар эслэгийн хэрэгцээг гаргахад 50-аас доош насны эмэгтэйчүүд 21-25 грамм, эрэгтэйчүүд 30-38 грамм, харин 1-18 насны хүүхдүүд 14-15 грамм эслэг шаардлагатай.      Өдөрт өөрт шаардагдах эслэгийн хэмжээг хангаж чадвал олон төрлийн архаг өвчний эрсдлийг эрс багасгадаг гэдгийг дэлхийн эрүүл мэндийн байгууллагаас тогтоосон байна.

Тиймээс өдөр тутмын эслэгийн хэмжээгээ хангахын тулд хамгийн өндөр эслэгийн агууламжтай бүтээгдэхүүн хүнсний хивэг болон овьёос зэргийг өдөр тутмынхаа хоолны цэсэнд оруулах хэрэгтэй. ½ аяга хивэг 2,2 грамм эслэгээр хангаж чаддаг. Хэдийгээр хүмүүс хивэгний ач холбогдлын талаар хангалттай мэдээлэлтэй байдаг ч хэрхэн хэрэглэх аргаа мэдэхгүй хүн маш олон байдаг. Тиймээс турахаар эсвэл дотор эрхтнээ эмчлэхээр дэглэм барьж байгаа үедээ хивгийг өдөр тутамдаа олон янзаар хэрэглэж болох энгийн аргуудаас хуваалцаж байна.

ОВЬЁОС ХҮНСНИЙ ХИВЭГ ХОЛЬСОН ЖИГНЭМЭГ

Овьёос -3 халбага

хүнсний хивэг 1 халбага

Сахар орлуулагч 2ш

Өндөг шартайгаа 1ш

Овьёос хивэг хоёроо өндөгтэйгээ зуурч, сахар орлуулагчаа нухаж холино. Хүсвэл бага зэргийн сүү юмуу цөцгийгөөр амт оруулж болно.

200 хэмтэй халуун зууханд 10-12 минут шарна.

ЭСЛЭГТҮҮДИЙН АМТАТ ЖИГНЭМЭГ

Нунтаг хүнсний хивэг 100грамм

хөх тарианы овъёос 200грамм

хар чавга "ясгүйгээр” 200грамм

200грамм чангаанз

100грамм бор үзэм

Овьёосоо нунтаглаж, хивэгтэйгээ холиод ясгүй чавга, чангаанз үзэм зэргээ дээр нь нэмж холиод, дээр нь халуун буцалсан ус хийгээд таглаж 20 минут дэвтээнэ. Бэлэн болсон бэлдмэлээ өдөрт 4 удаа цайны халбагаар иднэ.

ХИВЭГТЭЙ ТАЛХ

Хүнсний хивгийг өдөр тутмын хүнсний хэрэглээнд гурил, будаа зэрэгтээ бага зэргээр хольж хэрэглэж болно. Янз бүрийн талх, зөөлөн боов зэргийг хийхдээ хүнсний хивгээ сайтар бутлаад, маш нарийн ширхэгтэй болгож хөх тарианы болон цагаан гурилтайгаа холиод талх, нарийн боов, зөөлөн боов зэргийг хийж болно. 

ХИВЭГНИЙ ХОЛЬЦТОЙ ХООЛ

Цуйван болон бусад төрлийн гурилтай хоол иддэг бол хүнсний хивгийг гуриландаа хийж холиод зуурч болно. Мөн будаатай хоолонд будааны хэмжээнээс ¼ харьцаагаар хивгээ нэмж, хамтад нь агшааж эсвэл дэвтээсэн хивгээ нэмж хэрэглэж болно. Энэ нь өдрийн эслэгийн хэрэгцээгээ хангах сэргэлэн арга юм.

ХИВЭГТЭЙ ЦАЙ

Цай уух болгондоо нэг цайны халбага хивэг хутгаж уух нь сайн арга гэдгийг туршиж үзсэн бүсгүйчүүд хэлж байна. Хивэг гэдэс, дотрыг цэвэрлэдэг тул хоолны шингэц сайжирч, таны бие хөнгөрч сайхан мэдрэмж төрнө.

ХИВЭГТЭЙ АМТТАН

Өдөрт иддэг зууш, салат зэрэг дээрээ ч хүнсний хивгийг нунтаглан бэлтгээд цацаад идэж болно.  Энэ нь хоолны дуршлыг бууруулж шаардлагатай эслэгээр тань хангана. Оройд хоол идэх дуршлаа бууруулахын тулд тараг эсвэл шинэхэн жимсэн дээр тал аяга хивэг нунтаглаад цацаад идээрэй.  

ЖИМСНИЙ НУХАШТАЙ ТАЛХ

½ аяга хивэг, ½ аяга бор сахар, ½ аяга гурил, өндөг 2ш, алим 1ш, цөцгий 4 халбага

Хивэг гурилаа бор сахартайгаа сайтар хольж, алимны нухаш, цөцгий өндгөөрөө зуурна.  10 минут байлгасны дараа 400 градус халуун шарагчинд хийж 15 минут жигнэнэ.  

Хэрэв та алиманд дургүй бол нухсан гадил эсвэл бусад үр жимсийг туршаад үзээрэй.

Report.mn