"Huawei” компанийн санхүү хариуцсан захирал Мэн Ваньжоуг баривчилсан нь хууль бус байсан гэж түүний хуулийн багийнхан лхагва гарагт Канадын шүүхэд мэдэгдсэн байна.

 

М.Ваньжоу өнгөрсөн 12 дугаар сард Канадад баривчлагдсан юм. Тэрбээр Ираны эсрэг авсан хориг арга хэмжээг зөрчсөн хэрэгт холбогдсон бөгөөд түүнийг шилжүүлэн авах хүсэлтийг АНУ-ын Хууль зүйн яам гаргаад байгаа юм.

"Huawei” компанийн санхүү хариуцсан захирлыг 12 дугаар сард барьцаагаар сулласнаас хойш тэрбээр Ванкувер хот дахь гэртээ амьдарч байна. М.Ваньжоугийн хэргийг шүүх хурлыг хэрхэн үргэлжлүүлэх эсэхийг шийдэхийн тулд түүнийг лхагва гарагт шүүхэд дууджээ.

М.Ваньжоу энэ удаа шүүхийн урд хаалгаар орж ирсэн бөгөөд тэрбээр өнгөрсөн гуравдугаар сард газар доогуурх автомашины зогсоолоос шүүх рүү орж байжээ. Санхүү хариуцсан захирлын хуулийн багийнхан мэдэгдэхдээ, М.Ваньжоуг баривчилсан нь улс төрийн зорилготой, хууль бус байсан хэмээгээд, түүнийг АНУ-д шилжүүлэн өгөх ямар ч шалтгаан байхгүй гэжээ.

Мөн тэд М.Ваньжоуг дөрвөн сая ам.долларын үнэ бүхий байшингаас нь 10 сая гаруй ам.долларын үнэтэй байшин руу нүүлгэх зөвшөөрлийг шүүхээс хүссэн байна. Ингэснээр түүний аюулгүй байдал улам баталгаажих ажээ. Шүүх уг хүсэлтийг хүлээн зөвшөөрчээ.

М.Ваньжоу дараагийн удаа есдүгээр сарын 23-нд шүүх хурлаар орно. Уг шүүх хурал удаан үргэлжлэх төлөвтэй байгаа бөгөөд түүнийг шилжүүлэх хүсэлтийн талаар хэлэлцэж магадгүй байна.