Суданд Бүх нийтийн үйлдвэрчний эвлэлийн холбоо Шилжилтийн Цэргийн зөвлөлийг түлхэн унагаахыг уриалжээ. Энэ тухай тус холбооны албан ёсны цахим хуудаст мэдээлжээ.

"Итгэл эвдэгч Цэргийн зөвлөлийг түлхэн унагаахын тулд иргэний үл захирагдах ажиллагаа явуулахыг уриалж байна” хэмээн мэдэгдэлд дурдсан байна.

Гудамжинд гарч, жагсаал цуглаан хийж, том замууд болон боомтуудыг хаахыг Үйлдвэрчний эвлэлийн холбоо өөрийн талын дэмжигчиддээ уриалжээ.

Цэргийн зөвлөл өнгөрсөн 4 дүгээр сард Суданы Ерөнхийлөгч Омар аль-Баширыг албан тушаалаас нь огцруулсны дараа төрийн удирдлагыг гартаа авжээ. Сөрөг хүчнийхэн засгийн эрхийг иргэний засаглалд шилжүүлэн өгөхийг шаардан дөрөвдүгээр сарын 6-наас эхлэн Зэвсэгт хүчний төв байрны гадна суугаа ажил хаялт зарлажээ.