МИАТ ХК-ийн Сөүл дэх төлөөлөгчийн газрын тэргүүнээр Ш.Биндэрьяа гэж бүсгүй ажилладаг юм байна.  Гэвч сүүлийн үед түүний албан тушаалыг Зам, тээврийн хөгжлийн сайдын зөвлөх Б.Цогтгэрэл (дэд сайд асан) өөрийн найз Б.Энхбатдаа авч өгөхөөр улайраад эхэлсэн гэнэ.

Б.Энхбатын хувьд Монголын олон мянган залуусын адил БНСУ-д "хараар” ажиллаж байсан жирийн нэгэн. Өнгөрөгч 2016 оны сонгуулиар МАН үнэмлэхүй ялалт байгуулсны дараа Улаанбаатар хотын Сөүл хот дахь суурин төлөөлөгчөөр томилогдсон юм байна.

Эх сурвалжийн мэдээлснээр, энэ нөхөр сүүлийн үест МИАТ-ийн төлөөлөгчийн газрын даргад зүтгэж эхэлсэн гэх бөгөөд түүнийг зүтгүүлж байгаа бас нэг эрх мэдэлтэн нь Ерөнхий сайд У.Хүрэлсүх гэлцэх болов. Б.Энхбат нь У.Хүрэлсүхийн сайн дүү, МАН-ын дэргэдэх НАМЗХ-ны идэвхтэн гишүүн юм байна.

Өөрийгөө тагнуулж, чагнуулан байж Ерөнхий сайдын суудалд анх суусан, намын даргаа "60 тэрбумын" хэргээр онхолдуулсан Ерөнхий сайд У.Хүрэлсүхийн рейтинг сүүлийн үед эрчимтэй унах болсон нь түүний хийж буй төрийн албаны мэргэжлийн бус томилгоотой холбоотой гэдгийг хэн хүнгүй хэлнэ. Энэ удаа МИАТ-ын төлөөлөгчийн газрын тэргүүн гэх "хал балгүй" зөөлөн сэнтий (уг нь бол мэргэжлийн хүмүүсийн байх ёстой газар) НАМЗХ-ны цүнх баригчдын үүр болох бололтой.

ЭХ СУРВАЛЖ: INEWS.MN