Хэргийг тодруулбал, талийгаач долоодугаар сарын 29-ны өдөр согтуу байсан тул цагдаагийн байгууллагын "Эрүүлжүүлэх байр"-нд хүргэгдэн хоножээ. Харин маргааш нь буюу 30-ны өдөр "Эрүүлжүүлэх байр"-наас гарч, эрүүгийн мөрдөгч н.Номунтөгөлдөрийг даган цагдаагийн байгууллагын нэгэн өрөөнд орж, 40 орчим минут байсан нь үүдний камерын бичлэгт үлджээ. Ингээд цагдаагийн байрнаас гарч, зам руу явж байгаагаар бичлэг дууссан байна. Цагдаагийн байгууллагын бүх өрөө камертай боловч зөвхөн талийгаачийн орсон өрөөний камер тухайн үед бичлэг хийгээгүй байжээ.

Ингээд долоодугаар сарын 31-ны өдөр талийгаач дүүгийнхээ дэлгүүрт ирж, "эм авах мөнгө авсан" нь дэлгүүрийн бичлэгт үлдсэн байна. Тухайн бичлэгт талийгаач арайхийн алхаж байгаа, хөлөө арай ядан зөөж байгаа нь бичигдсэн байна. Үүнээс хойш буюу долоодугаар сарын 1, 2-ны өдрүүдэд найзынхаа гэрт зовиурлаж байгаад 3-ны өдөр амиа алджээ. Энэ үедээ тэрбээр эгчийнхээ охинд болон найз нартаа "Номунтөгөлдөр, Ариунбат, Батмөнх, нэрийг нь мэдэхгүй бас нэг цагдаа нар зодсон. Бүсэлхийнээс доош өшиглөсөн болохоор алхаж явж чадахгүй байна, дотор муухайраад ус ууж, хоол унд идэж чадахгүй байна" гэдгээ хэлжээ.

 Талийгаачийг амьсгал хурааснаас хоёр хоногийн дараа буюу наймдугаар сарын 5-ны өдөр задлан шинжилгээнд оруулсан бөгөөд 20 хоногийн дотор гарах учиртай хариу хоёр сарын дараа буюу аравдугаар сарын 1-ний өдөр гарчээ. Уг хариунд "Мохоо зүйлээр цохисноос шарх үүссэн. Үхлийн шалтгаан нь архины хордлого. Гадны нөлөөгүй" гэсэн дүгнэлт гарчээ. Тиймээс ар гэрийнхэн нь гомдолтой байгаагаа илэрхийлэн олон нийтэд хандахаар манай редакцид ирсэн юм. Ар гэрийнхэн нь цагдаагийн байгууллагад хандахаас гадна, "цагдаа цагдаагаа хаацайлсан шийдвэр гаргаж магадгүй" хэмээн хардаж АТГ-т ч өргөдлөө өгсөн байна. Гэвч хэрэг шалгах үйл явц маш удаан, шалгаж байгаа эсэх нь ч тодорхойгүй байгаа аж.

Харин талийгаачийг зодсон, магадгүй үхэлд хүргэсэн хэрэгт холбогдсон цагдаагийн алба хаагч нар өнөөдөр хэвийн ажлаа хийгээд явж байгаа юм байна.