Цөмийн дайн дэгдэх эрсдэл нэмэгдэж, дэлхий дахинд нөхцөл байдал илүү аюултай болж байгаад улс хоорондын итгэлцэл, яриа хэлэлцээ дутмаг, шинжлэх ухаан, шинэ технологийн хурдацтай хөгжил зэрэг олон шалтгаан байгаа юм хэмээн НҮБ-ын ерөнхий нарийн бичгийн даргын зэвсгийн тоо хэмжээг бууруулах асуудал эрхэлсэн орлогч Ижуми Накамицу мэдэгджээ.

 

 

"Зэвсэглэлд хяналт тавих асуудал хариуцсан олон байгууллага, шинжээчид цөмийн сөргөлдөөний эрсдэл нэмэгдэж байгаа талаар ярьж байгаа. Нөхцөл байдал дахин аюултай болж байна гэх болгоомжлол байгаа бөгөөд би үүнд олон шалтгаан байгаа гэж бодож байгаа. Улс хоорондын итгэлцэл ноцтой алдагдаж байна. Түүнчлэн яриа хэлэлцээ дутмаг байгааг цохон тэмдэглэх нь зүйтэй. Их гүрнүүд хийгээд бусад улс орон дипломат үйл ажиллагаа, яриа хэлэлцээ гэхээсээ цэргийн нөөц бололцоог илүү үнэлж эхэлж байгаа бололтой. Түүнчлэн олон улсын харилцаа дордож байгаа нь ажиглагдаж байгаа” хэмээн тэрбээр ярьжээ.