Японы өдөр тутмын томоохон сонин болох "The Yomiuri Shimbun”-ы уншигчид улиран одож буй оны гол үйл явдлаар Хонконгийн эсэргүүцлийн жагсаалыг нэрлэжээ. Холбогдох жагсаалтыг тус сонин ням гарагт нийтэлсэн байна.

 

Сэжигтнийг шилжүүлэн өгөх тухай хуулийн төслийг хэлэлцэж эхэлснийг эсэргүүцсэн томоохон жагсаал Хонконгт өрнөсөн билээ. Хэдийгээр уг хуулийн төслийг эргүүлсэн татсан боловч залуус голдуу сөрөг хүчнийхэн Засгийн газрын эсрэг ажиллагаагаа үргэлжлүүлсээр байгаа юм. Эсэргүүцлийн жагсаал эхэлснээс хойш 6000 гаруй хүнийг баривчилсан боловч энэ нь жагсаалын цар хүрээнд нөлөөлөөгүй гэж тус сонинд онцлон тэмдэглэжээ.

2019 оны хоёр дахь том үйл явдал нь Парисын Эх дагинын сүмд гарсан түймэр болсон байна. Парис хотын бахархал болсон уг сүм дөрөвдүгээр сарын 15-нд галд өртөж, сүмийн орой болон дээврийн хэсэг бүхэлдээ шатсан юм. Сүмийг сэргээн засахад дэлхийн өнцөг булан бүрээс 900 сая орчим еврогийн хандив цугларсан бөгөөд харин сэргээн засах ажил 2021 оноос хойш л эхэлж магадгүй байна.

Жагсаалтын гуравдугаарт Шведийн байгаль орчныг хамгаалагч идэвхтэн Грета Тунбергийн НҮБ-д хэлсэн үг оржээ. Залуу идэвхтэн НҮБ-ын индрээс үг хэлэхдээ, байгаль орчны асуудлыг хөндөж, дэлхийн удирдагчдыг шүүмжилсэн юм. Америкийн "Time” сэтгүүл түүнийг "Оны хүнээр” тодруулсан билээ.

Энэ оны хамгийн гол явдлуудын эхний тавд мөн 11 дүгээр сард БНАСАУ шумбагч онгоцноос дунд зайн тусгалтай баллистик пуужин харвасан явдал болон АНУ Парисын уур амьсгалын гэрээнээс гарах үйл явц багтжээ. "The Yomiuri Shimbun” сонин олон улсын чухал үйл явдлын мэдээнүүдийн жагсаалтыг 1989 оноос хойш гаргаж байгаа ажээ. Энэ жил уг жагсаалтыг гаргахдаа 12 мянга орчим уншигчийн санал бодлыг харгалзсан байна.