Мягмар гарагт Япон, БНХАУ, БНСУ-ын удирдагчид БНАСАУ-ыг цөмийн зэвсгээс ангижруулах чиглэлд гурван талын хамтын ажиллагаагаа бэхжүүлэхээр тохиролцсон байна.

Японы Ерөнхий сайд Абэ Шинзо АНУ, БНАСАУ-ын хэлэлцээний эрчийг хадгалах хэрэгтэй гэдгийг цохон тэмдэглээд, НҮБ-ын Аюулгүйн Зөвлөлийн тогтоолуудыг бүрэн хэрэгжүүлэхийн чухалыг онцолжээ.

Япон, БНХАУ, БНСУ-ын удирдагчдын гурван талын дээд хэмжээний уулзалтын дараа болсон хэвлэлийн бага хурлын үеэр БНХАУ-ын Төрийн зөвлөлийн Ерөнхий сайд Ли Көцян Солонгосын хойгийн асуудлуудыг яриа хэлэлцээний замаар шийдвэрлэнэ хэмээн найдаж буйгаа илэрхийлсэн байна. 

БНХАУ-ын баруун өмнөд нутгийн Чэнду хотноо болсон энэхүү уулзалтын үеэр гурван орны удирдагчид эдийн засгийн хамтын ажиллагааг бэхжүүлэх талаар мөн хэлэлцжээ. "Гурван талын худалдааны хэлэлцээрийн талаарх яриа хэлэлцээг эрчимжүүлэхээр тохиролцлоо" гэж Ли Көцян хэлжээ.

Мөн талууд Солонгосын хойгийг цөмийн зэвсгээс бүрэн ангижруулах талаар санал бодлоо солилцжээ. Үүнээс гадна Японы Ерөнхий сайд 1970, 1980-аад оны үед Пёньянд хулгайлагдсан Япон иргэдийн асуудлыг зохицуулах чиглэлд хамтран ажиллахыг хүссэн байна.

Япон, БНХАУ, БНСУ-ын удирдагчдын дээд хэмжээний уулзалтыг найм дахь удаагаа зохион байгуулж буй энэ бөгөөд анхны уулзалт 1999 онд болжээ.