ОХУ-ын сөрөг хүчний удирдагч Алексей Навальный ухаан оржээ. Түүний биеийн байдал нь сайжирч байгаа учир амьсгалын аппаратнаас нь салгаж байгаа тухай Германы "Charite” эмнэлэг мэдэгдсэн байна.

"Наймдугаар сарын 22-ноос хойш манай эмнэлэгт хэвтэж буй А.Навальныйгийн биеийн байдал дээрдэж байна. Өвчтөн ярианд хариу үйлдэл үзүүлж байгаа учир түүнд залгасан хиймэл амьсгалын аппаратыг салгаж байна” хэмээн мэдэгдэлд дурдсан байна. Гэсэн ч А.Навальныйгийн эрүүл мэндэд урт хугацаандаа үр дагавар илэрч болзошгүйг үгүйсгэх аргагүй гэдгийг мэдэгдэлд дурдав. 

"Томск-Москва” хотын чиглэлд нислэг үйлдэж байсан онгоцонд сууж явсан А.Навальныйгийн бие тавгүйрхэж, 8 дугаар сарын 20-нд эмнэлэгт хүргэгджээ. Ухаангүй байдалтай байхад нь түүнд хиймэл амьсгалан аппарат залгасан байна. Хожим нь Оросын эмч нар түүний биеэс ямар нэгэн хортой бодис илрээгүй гэжээ. Харин 8 дугаар сарын 22-нд А.Навальныйг Германы Берлин хотын "Charite” эмнэлэг рүү шилжүүлээд удаагүй байхад эмч нар түүнийг хордуулсан гэж үзсэн байна. Түүнийг "холинестеразын дарангуйлагчид” хэмээх бодисын идэвхтэй бүлгээс гаралтай бодисоор хордуулсан болохыг шинжилгээний дүн нотолсон ч яг ямар төрлийн бодис гэдэг нь тодорхойгүй байна хэмээн тухайн үедээ Германы эмч нар мэдэгджээ.