Балетчин Б.Сүндэрьяа буюу Сүнээ балетын сургууль дээрээ хичээл зааж байх үе нэгэн эрэгтэй ирж биед нь халдаж буй бичлэг өчигдөр сошиал орчинд татагдсан. Улмаар иргэд олон нийтийн зүгээс гэгээн цагаан өдрөөр хэн дуртай нь ирээд зоддог нийгэм болчихсон юм уу хэмээн маш шүүмжлэлтэй хандаж, цагдаагийнхнаас хариуцлага нэхэж байлаа. 

Тэгвэл Б.Сүндэрьяагийн биед халдсан З гэгчийг саатуулан мөрдөн шалгах ажиллагаа явагдаж байгаа талаар цагдаагийн байгууллагаас мэдээллээ. 

Эх сурвалжийн мэдээлснээр иргэн З нь сэтгэцийн өвчтэй бөгөөд хэрэг хүлээх чадвартай гэнэ. 

Харин Сүнээ өөрийн цахим хуудаснаа "Нэг л өдөр би бусдын гарт амь насаа алдах нь тодорхой юм байна. Ажлынхаа байран дээр аймшигтайгаар зодууллаа. Ухаан ороод хартал өмнө нь манай ажил дээр хутгатай ирсэн залуу мөн байна.  Намайг дарамтлаад байна сүрдүүлээд байна гэж өчнөөн удаа өргөдөл гомдол өгсөн. Прокурорын  байгууллагаас дандаа хаана. Шүүхийн шатруугаа хэзээ ч явдаггүй. Өчнөөн удаа дахин дахин гомдол өгч хавтаст хэргээ дахиад нээнэ. Дахиад прокурор нь хаана.Хоолойг чинь хэрчиж ална, дүүжлэнэ заавал алж байж сална гэдгээ нэг л өдөр биелүүлэх юм байна. Иргэн хүний хуулиараа хамгаалагдсан амьд явах эрх минь үнэндээ аймшигтай зөрчигдөж байна" хэмээн нийтэлж зураг видеог оруулсан байна.