Тихановская Лукашенкод шаардлага тавьж, биелүүлэхэд 13 хоногийн хугацаа өгчээ
Беларусийн сөрөг хүчний удирдагч Светлана Тихановская Александр Лукашенког ерөнхийлөгчийн албан тушаалаас огцрох өдрөө зарлах, жагсагчдын эсрэг хүч хэрэглэхээ зогсоох, улс төрийн хоригдлуудыг суллах гэсэн тус улсыг хямралаас гаргах гурван болзлыг биелүүлэхийг эрх баригчдаас шаарджээ.
Хэрэв шаардлагыг нь 10 дугаар сарын 25 гэхэд биелүүлэхгүй бол сөрөг хүчнийхэн бүх нийтийн ажил хаялт зохион байгуулах аж.
"Улс төрийн хямрал, хүчирхийлэл, хууль бус явдал эхэлснээс хойш хоёр сарын хугацаа өнгөрлөө. Бидний хувьд хангалттай. 10 дугаар сарын 25-нд бид "ард түмний тулган шаардах бичиг" гаргана. Лукашенко огцорч байгаагаа мэдэгдэх, гудамжинд болж буй хүчирхийллийг бүрэн зогсоох, улс төрийн бүх хоригдлыг суллагдах гэсэн заавал биелүүлэх ёстой гурван шаардлагыг биелүүлэхэд дэглэмд 13 хоногийн хугацаа үлдэж байна" гэж Тихановская мягмар гарагт өөрийн Telegram сувагт нийтэлсэн мэдэгдэлдээ дурджээ.
Хэрэв эрх баригчид буулт хийхээс татгалзвал "ард түмний тулган шаардах бичиг" барьж, орон даяар тайван жагсаал хийнэ гэж Тихановская анхааруулав. 10 дугаар сарын 26-наас бүх үйлдвэрт бүх нийтийн ажил хаялт зарлаж, бүх замыг хааж, улмаар улсын дэлгүүрүүдийн худалдаа уналтад орно гэж тэрбээр хэлсэн байна.
"Бидэнд бэлтгэл хийх 13 хоног байгаа бөгөөд энэ хугацаанд беларусьчууд тайван, тууштай эсэргүүцлээ үргэлжлүүлэх болно" гэж Тихановская нэмж дурджээ.
Наймдугаар сарын 9-нд болсон ерөнхийлөгчийн сонгуулийн албан ёсны дүнг эсэргүүцсэн жагсаал Беларусьт хоёр гаруй сар үргэлжилж байгаа юм. Тус улсын Сонгуулийн төв хорооноос мэдээлснээр, энэ удаагийн сонгуульд Лукашенко 80 хувийн санал авч, зургаа дахь удаагаа Ерөнхийлөгчөөр сонгогдсон байна.
Сэтгэгдэл байхгүй байна.