Нийслэлийн төвийн 6 дүүрэгт ирэх долоо хоногт PCR шинжилгээний иж бүрэн лаборатори үйл ажиллагаагаа эхлүүлэхээр тоног төхөөрөмжөө хүлээн авч суурилуулан бэлтгэл ажлыг хангаж байна. Энэ талаар ЭМЯ, ХӨСҮТ-өөс зохион байгуулж буй бүсийн онлайн сургалтын үеэр Лабораторийн мэргэжлийн салбар зөвлөлөөс өнөөдөр мэдээллээ. 

Сургалтыг ДЭМБ-тай хамтран 1 дүгээр сарын 7-9-нд 3 удаагийн бүсчилсэн байдлаар зохион байгуулж байна. Сургалтад  21 аймаг, 9 дүүргийн эрүүл мэндийн газрын дарга, мэргэжилтэн, тархвар болон халдвар судлаач, лабораторийн эмч, мэргэжилтнүүд, өрхийн эмнэлгийн эмч, сувилагч 250 гаруй хүн оролцож байна. Сургалтаар "COVID-19"-ийн халдварын сорьц цуглуулах, тээвэрлэх, халдвар хамгаалал-аюулгүй ажиллагаа, лабораторийн оношилгооны талаар ярилцаж, нийгмийн эрүүл мэнд болон лабораторийн шинжилгээнд суурилсан тандалтын уялдаа холбоо, шинжилгээний сорьц авах талаар мэргэжилтэнүүд илтгэл тавьж зөвлөмж хүргэж байна.

Монгол Улсын нутаг дэвсгэр, засаг захиргааны байршлын онцлогоос хамааран шинжилгээний сорьцыг орон нутгаас тээвэрлэхэд цаг хугацаа болон тээврийн хэрэгслийн асуудал гарсаар байна. Энэ хүндрэлийг тодорхой хэмжээгээр шийдвэрлэх зорилгоор ЭМЯ, ЗТХЯ-ны сайд нарын баталсан хамтарсан тушаалыг үндэслэн агаарын тээврийн "Аэромонголиа” болон газрын тээврийн "Монгол шуудан” компаниудтай хамтарч ажиллах, сорьц тээвэрлэлтийн ложистикийн талаар хамтран ажиллах тухай яригдлаа. Мөн энэхүү байгууллагуудын төлөөлөгч нарыг оролцуулж холбогдох ажил үүргийн төлөвлөгөөг эрүүл мэндийн байгууллагуудад танилцууллаа.

Сургалтын үеэр шинээр 14 аймагт молекул биологийн лаборатори байгуулах, хүний нөөцийн чадавхийг нэмэгдүүлэх талаар мэдээллээ. Тодруулвал лабораторийн тоног төхөөрөмжийн эхний захиалгууд энэ сарын 15,16-нд ирэх бөгөөд энэ сарын сүүл гэхэд бүх аймгууд PCR шинжилгээний иж бүрэн лабораторитой болох юм. Одоогийн байдлаар Орхон, Дархан, Ховд, Дорнод, Сэлэнгэ, Дорноговь аймаг болон Замын-Үүд суманд молекул биологийн лабораториуд ажиллаж байна.