Монголчууд дулаан явбал мянган лан гэж ярьдаг. Тиймээс Та ХЭРЭГЛЭГЧ ТА өөрийн эзэмшлийн байр сууцанд дулаалга, засвар, үйлчилгээг мэргэжлийн хүмүүсээр тогтмол хийлгэж, шалгуулж байх шаардлагатай. Ингэснээр Та өөрийн ая тухтай, аюулгүй орчинг бүрдүүлж, мөн дулааны эрчим хүчээ хэмнэх боломжтой болно.Барилгын дулаан нь дараах хоёр үндсэн хэлбэрээр алдагддаг байна.

Агаар нэвтрэлтийн алдагдал-Барилгын хаалга, цонх, хананд зай завсар гарвал түүгээр агаар гадагшилж түүнтэй хамт их хэмжээний дулаан алдагдана. Зай завсраар гарах дулаан агаарын алдагдлыг олон улсын нэр томъёогоор инфильтрацийн алдагдал хэмээнэ.

Ханын дулаалга-Мэргэжлийн хүмүүсээс зөвлөгөө авч, эрчим хүчний хэмнэлттэй, эрүүл мэндэд элдэв сөрөг нөлөөгүй шинэ дэвшилтэт технологийг сонгон байр сууцныхаа ханыг дулаалах хэрэгтэй.

Хаалга- Хаалгаар хүйтэн агаар их ордог бол давхар хаалга хийх эсвэл хаалгыг пролон, лидрин ашиглан дулаалах хэрэгтэй.

Цонх-Цонхны хананд суусан хэсгүүд зай завсартай бол шахдаг хөөс эсвэл силикон цавуу ашиглан зайг бөглөөрэй. Гол нь цаг агаар арай дулаан үед хүйтэн температурт тэсвэртэй бүтээгдэхүүн ашиглахаа бүү мартаарай. Вакум цонхны жийрэг резин муудсанаас болж завсраар нь тоос шороо, агаар нэвтэрдэг тул жийргийг солих хэрэгтэй. Резиний насыг уртасгахын тулд цонхоо арчлах үедээ жилд дор хаяж нэг удаа ургамлын тосоор тослоно. Чанар муутай цонхнуудын хүрээ сэнсэрснээс үүдэн гажиж дулаан алдалтыг ихэсгэдэг. Энэ үед завсар зайг наалттай хөөсөнцөр туузаар наах хэрэгтэй. Нийт хэсгээрээ хүйт нэвтрүүлж байгаа бол бүхэлд нь том гялгар уутаар бүрхэж өгөөрэй. Мөн том цонхнуудын шил нь өөрөө хүйтнийг дамжуулдаг тул ялангуяа хойшоо харсан том цонхыг тусгай гялгар уутан плёнкоор бүрэх хэрэгтэй. Цонх, хаалганы завсар зайг сайтар чигжиж битүүмжлэх, ингэснээр алдагдлыг наад зах нь 5-15% бууруулах боломжтой

Халаалт-Дотор халаалтын системийн тараалтын шугам, халаах хэрэгсэл, таслах хаалтуудад үзлэг хийлгүүлж, шаардлага хангахгүй болсон бөглөөтэй шугам, барьдаггүй таслах хаалт, бохирдсон халаах хэрэгслүүдийг сольж шинэчлэх шаардлагатай. Мөн ханын радиаторын халаалтыг сайжруулахын тулд тусгай зориулалтын мөнгөлөг цаасыг радиаторын араар хийж өгөх хэрэгтэй. Ингэснээр халууныг гадна хана уруу бус өрөө тийш ойлгож өгдөг.

Холболт-Жигд халдаггүй халаалтын системд тохируулга хийлгүүлж, балансын хаалт суурилуулах, буруу холболтыг засуулах хэрэгтэй.

"УЛААНБААТАР ДУЛААНЫ СҮЛЖЭЭ” ТӨХК