Говь-Алтай аймгийн Тонхил сумын Засаг даргын тамгын газар энэ сарын 14-нөөс ирэх 12 дугаар сарын 13-ныг хүртэл "Шилдэг анчин" шалгаруулах чонын авын болзолт уралдаан зарлажээ. Тонхил сумын нутаг дэвсгэрт дээрх хоёр сарын хугацаанд хамгийн олон чоно авласан багуудыг шалгаруулж, тэргүүн байр гурван сая, дэд байр хоёр сая, гуравдугаар байр нэг сая төгрөгөөр тус тус шагнана. Мөн шилдэг нэг анчныг шалгаруулах юм байна. Сонирхуулахад, шагналын санг мал бүхий өрхөөс бүрдүүлэх бөгөөд багийн иргэдийн нийтийн хурлаар баталсан болзлын дагуу дүгнэх ажээ. Говь-Алтай аймагт энэ оны нэгдүгээр сарын 6-наас эхлэн мал сүргийг хамгаалах, тухайн нутаг дэвсгэрт тоо толгойг нь сийрэгжүүлэх зорилгоор саарал чоныг ахуйн зориулалтаар агнахыг ан амьтны нөөц ашигласны төлбөрөөс хоёр жилийн хугацаатай чөлөөлөхөөр болсон байна. Үүний сацуу ахуйн зориулалтаар саарал чоно агнах ажлыг аймгийн хэмжээнд нэг сарын хугацаанд зохион байгуулжээ.