АНУ-ын эрх баригчид бүтэн тавин жил үргэлжилсэн хөндий харилцааг сэргээж Кубад элчин сайдын яамаа байгуулан, дипломат харилцаагаа сэргээх зөвшилцөлд хүрчээ.
 
Ерөнхийлөгч Барак Обама болон Венад Ираны цөмийн асуудлаар хэлэлцэж буй Төрийн нарийн бичгийн дарга Жонн Керри нар аль аль нь Кубатай харилцаагаа бүрэн сэргээсэн талаар ам нээсэн байна.
 
Түүнчлэн Кубын засгийн газар ч үүнтэй адил мэдэгдэл хийхээр бэлдэж байгаа. Ингэснээр хагас жилийн өмнө харилцаагаа сэргээх шийдвэрт хүрсэн хоёр орон хүйтэн дайнаас хойш анх удаа дипломат харилцаатай болох юм.
 
Хоёр улс Гавана болон Вашингтонд элчин сайдын яам нээх ажил ирэх сар гэхэд дуусах биз. Учир нь Төрийн департамент элчин сайдын яам нээх тухай мэдэгдлийг 15 хоногийн өмнө Конгрессод өргөн барих ёстой аж.
 
АНУ болон Куба улсууд 2013 оны дунд үеэс эхлэн нууцаар хэлэлцээ хийж эхэлсэн бөгөөд эцэстээ 2014 оны арван хоёрдугаар сарын 17-ны өдөр түүхэн хэлэлцээрт хүрсэн билээ.  
 
Ингээд өнгөрсөн тавдугаар сард АНУ Кубыг терроризмыг санхүүжүүлэгч орнуудын жагсаалтаас хассан юм.

Эх сурвалж: