Өнгөрөгч лхагва гаригт Камеруны Мароуа хотод цуврал бөмбөг дэлбэрчээ. Дэлбэрэлтийн улмаас 11 хүн амь үрэгдэж, 30 гаруй хүн шархадсан тухай Камерун улсын ерөнхийлөгч Пол Бияагийн албан ёсны вэбсайтад мэдээлсэн байна.

Мароуа хот нь Нигери улстай хил залгаа оршдог бөгөөд хэт даврагч Боко Харам бүлгийн эсрэг үйл ажиллагаа явуулдаг цэргийн бааз байрладаг аж.

Лхагва гаригийн халдлагыг хэн үйлдсэн нь тодорхой бус байгаа боловч тус улсын мэдээллийн хэрэгслээр бөмбөгдөлтийн ард Боко Харам бүлэглэл байгаа хэмээн сэжиглэж байна.

Сүүлийн саруудад Боко Харам бүлэглэл Камерун, Чад  улсуудад томоохон хэмжээний халдлага үйлдсээр байгаа юм.

Эдгээр улсууд нь тус хэт даврагч бүлэглэлийн эсрэг үйл ажиллагаа явуулдаг бөгөөд Нигери улстай хил залгаа оршдог юм.