Улсын төсөв энэ оны эхний зургаан сарын байдлаар 510 тэрбумаар тасарсан болохыг албаны эх сурвалж онцолж байна. Одоогоор  улсын төсөв 2.6 их наяд байгаа бол төсвийн санхүүжилт 3.2 их наядад хүрсэн үзүүлэлттэй байгаа аж.

Тэгвэл төсвийн тасалдалд нөлөөлөл үзүүлж буй гол хүчин зүйлүүд юу бэ? Сангийн яамнаас өгсөн тайлбараар бол  манай улсын уул уурхайн бүтээгдэхүүний борлуулалт бага, зэсийн үнэ дэлхийн зах зээл дээр унасан, импорт эрс буурсан зэрэг хүчин зүйлүүдийг нэрлэж байгаа юм.

Тодруулбал, энэ оны хагас жилийн байдлаар,

• Гаалийн албан татвар  -70 тэрбум
• Хүүгийн орлого             - 53.8 тэрбум
• Газрын тос                    - 71 тэрбум
• Өмч хувьчлал               - 127 тэрбум
• НӨАТ                            - 170 тэрбумаар тус тус тасраад байгаа аж.

Улсын төсөв тасрахад нөлөөлөл үзүүлж буй гол хүчин зүйлүүд нь дээрх  татварын  тасралтууд юм. Манай улс төсвөө 88 хувийг татвараар, үлдсэн 12 хувьд татварын бус орлогоор бүрдүүлдэг тул  нэр бүхий татварын тасралтууд хүчтэй нөлөөг үзүүлж буй юм. 

Харин уул уурхайн бүтээгдэхүүний хувьд  манай улс энэ оны эхний зургаан сарын байдлаар 650 мян.тонн зэсийн баяжмал экспортолсон бөгөөд энэ нь өмнө оны мөн үеэс  100 мян.тонноор өссөн үзүүлэлт юм. Гэсэн ч дэлхийн зах зээл дээр энэ жил зэсийн үнэ уналттай байгаатай холбогдон, улсын тасалдалд нөлөөлөл  үзүүлэх хэмжээнд очоод байгаа аж.