Н.Ану: Монголд анх удаа уруулаараа үнсэж зурсан зургаар үзэсгэлэн гаргаж байгаа

0

БНХАУ-ын Санья хотод арван хоёрдугаар сарын 19 –нд болох "Дэлхийн мисс 2015” тэмцээнд эх орноо төлөөлөн оролцох үндэсний ялагчаар тодорсон мисс Н.Анутай ярилцлаа. Тэрбээр 2013 онд Монголын мисс болж байсан бөгөөд олон улсын чанартай хэд хэдэн тэмцээнээс тэргүүн шагналыг нь хүртэж, Миссийн титмээ загварын амжилтаараа "өнгөлж” яваа сайхан бүсгүй билээ.

-Юуны өмнө танд эх орноо төлөөлөн "Дэлхийн мисс 2015” тэмцээнд оролцохоор болсонд баяр хүргэе?

-Баярлалаа. "Дэлхийн мисс 2015” тэмцээн БНХАУ-ын Санья хотод ирэх арван хоёрдугаар дугаар сарын 19-нд болно. Уг тэмцээнд эх орноо төлөөлөн оролцох болсондоо маш их баяртай байна. Энэ бол хүн болгонд хүн болгонд тохиогоод байдаггүй маш том боломж, бас маш том хариуцлага гэж бодож байгаа. Тийм ч учраас маш эртнээс тэмцээндээ бэлдэж эхэлсэн.

-Дэлхийн мисс-т орох бэлтгэлээ хэр хангаж байна?

-Сайн үйлсийн аян, авьяаслаг мисс, спортлог мисс зэрэг төрлүүдийнхээ бэлтгэл ажлыг наадмын дараагаас илүү эрчимтэй хийж эхэлсэн. Мөн өөрийгөө илүү их хөгжүүлэх үүднээс илтгэх урлаг болон англи хэлний сургалтад хамрагдаж байгаа. Энэ бүх зүйл дээр маань дэмжиж хамран ажиллаж байгаа байгуулагууддаа баярлалаа гэж хэлмээр байна.

-Тэмцээндээ орохоос өмнө өөр өөрийн улс орныхоо нийгэм эдийн засагт тулгарч буй асуудлыг өөрийн нүдээр харж, тухайн салбартаа хүмүүнлэгийн ажил хийх ёстой байдаг. Таны хувьд хүмүүнлэгийн үйлсэд чухам юу хийж байна вэ?

-Миний хувьд хүмүүнлэгийн ажил буюу сайн үйлсийн аян /beauty with purpose/ дээрээ илүү их ач холбогдол өгч ажиллаж байгаа. Энэ ажлынхаа хүрээнд хамгийн эхлээд өсвөр насны хүүхдүүдэд бэлгийн бойжилтын чиглэлээр мэдээлэл өгөх зорилгоор видео танилцуулга хийж байгаа. Яагаад энэ сэдвийг сонгож авсан вэ гэхээр манайд энэ талын мэдээлэл хомс байдаг учраас бэлгийн замын өвчлөл болон хүсээгүй жирэмслэлт ихээр гардаг болсон. Саяхан телевизээр өсвөр насныхны дунд тэмбүү өвчний өвчлөл их байна гэсэн мэдээлэл цацагдаж байсан. Тийм учраас энэ тал дээр илүү их анхаарч ажиллахыг хүссэн. Харин хоёр дахь ажил зургийн үзэсгэлэн байгаа. Миний үзэсгэлэнд эмэгтэйчүүдийн эрхийг хамгаалсан, бусдыг зөв зүйлд уриалсан, дэлхийд алдартай хүмүүсийн хөрөг зургууд дэлгэгдэнэ. Хүмүүс намайг үзэсгэлэн гаргана гэхээр гайхаж байгаа байх учир нь би мэргэжлийн зураач биш. Зөвхөн миний өөрийнхөө уруулаар зурсан зургууд дэлгэгдэхээрээ онцлогтой. Би энэ үзэсгэлэнгээсээ олсон орлогоороо нийгмийн эмзэг давхаргын амьжиргааны төвшин доогуур хүүхдүүдэд сурч боловсорч, өөрийгөө хөгжүүлэх тал дээр нь тусалж дэмжих зорилготойгоор зохион байгуулж байгаа.

-Үзэсгэлэн хэзээ нээлтээ хийх вэ?

-Үзэсгэлэн маань Q Art галерейд энэ сарын 18-нд нээлтээ хийгээд 20 хүртэл гурван хоног үргэлжилнэ. Үзэсгэлэнгээ дууссаны дараа Фэйсбүүк дээр идэвхжүүлэлт хийгээд үзэсгэлэнд дэлгэгдсэн зургуудаа худалдаалах бодолтой байгаа. Тиймээс Монголынхоо миссийг дэмжээд сайн үйлсийн аянд зориулж зурсан зургуудыг маань худалдаж авах тал дээр анхаараасай гэж хүсэж байна. Монголдоо анх удаа ийм төрлийн үзэсгэлэн гаргасан болохоор Дэлхийн мисс-т оролцохдоо сайн үйлсийн аян болон авьяаслаг миссийн төрөлд өндөр оноо авахад маань илүү түлхэц болох болов уу гэж найдаж байгаа.

-Уруулаараа зурдаг хүмүүс ховорхон байдаг байх. Хэзээнээс уруулаараа зураг зурж эхэлсэн бэ?

-Энэ авьяасаа 2013 онд Монголын мисс-т орохдоо авьяас үзүүлбэрээрээ анх үзүүлж байсан. Энэ авьяасаа нээж илрүүлэхэд манай хамаатны С.Манлай, О.Мандах гээд зураач ах, эгч хоёр маань маш их тусалж дэмжсэн. Одоо гаргаж байгаа үзэсгэлэн дээр ч гэсэн ах, эгч хоёр маань тусалж байгаа. Тиймээс баярлалаа гэж хэлмээр байна. Уруулаараа зураг зурдаг хүн Монголд бараг байдаггүй байх. Тэгэхээр одоо гаргаж байгаа үзэсгэлэн маань Монголдоо анхдагч гэж хэлж болно.

-Үзэсгэлэнд ямар чиглэлийн зургууд дэлгэгдэх вэ?

-Сүүдрээр нь ялгаж зурсан. Ихэнх нь Поп арт чиглэлийн алдартай хүмүүсийн хөрөг зургууд. Жишээлбэл,Нэрт яруу найрагч Р.Чойном гуайн хөргийг уруулаараа үнсэж зурсан байгаа. Энэ хүн шударга үнэний дуу хоолой болон, залуу хойч үедээ оюуны үнэтэй хөрөнгө оруулалт оруулж алдар нэр мөнхөрсөн хүн. Мөн дээрээс нь манай найз залуу Р.Чойном гуайн зээ хүү нь. Тиймээс би энэ хүндтэй хүнийг сонгож зурсан. Зарим хүмүүс намайг ийм мундаг хүмүүсийн хөрөг зургийг зураад үзэсгэлэн гаргана гэхээр шүүмжлэлтэй хандаж магадгүй. Хамгийн гол нь би мэргэжлийн хүн биш өөрийнхөө авьяасыг хөгжүүлээд явж байгаа залуу хүн. Тийм учраас сайн үйлсийн аянд зориулж өөрийнхөө чадах хэмжээнд сэтгэл гаргаж зурсан зургуудаас маань бүрдсэн үзэсгэлэнг олон хүн ирж үзээд, сайн үйлсийн аянд гар бие оролцоосой гэж хүсэж байна.

Хаяг

Хаяг: Q Art Galerie, Белла Виста хотхон, Зайсан, Улаанбаатар хот

Утас: 77111313

Захирал: Ж.Бат-Ундар  99065241

Сан хөмрөгч: О.Баасандагва  99936041

http: www.galerie.mn

facebook: Q Art Galerie

E-mail: info@galerie.mn

Instagramm: qgalerieub

Twitter: Q-Art

-Сүүлийн үед олон улсын ямар ямар тэмцээн уралдаанд оролцов. Амжилтаасаа хуваалцахгүй юу?

-Өнгөрсөн оны төгсгөлд Хятад, Монгол, Орос гурвын эв найрамдлын бэлгэдэл болсон "Манжуурын мисс 2014” наадамд түрүүлсэн. Мөн он гараад 2015 онд Азийн супер модель шалгаруулах тэмцээнд оролцоод Азийн супер модель цол авсан. Үүний дараа "Super Model International” наадмын 3 төрөлд шагнал аваад дэд байранд шалгарч байсан.

-Дэлхийн мисс-ийн тэмцээнд өрсөлдөх өрсөлдөгчдөө албан ёсны сайтаас харсан байх. Та тэднээс өөрийгөө юугаараа илүү гэж бодож байна вэ?

-Харсан. Бүгд өөр өөрсдийн гэсэн давуу талтай авьяаслаг, спортлог мундаг охидууд байна лээ. Миний хувьд сайн үйлсийн аян болон моделийн төрөл дээр арай илүү байх болов уу гэж найдаж байгаа.

-Чиний өндөр, жин, биеийн харьцаа?

-178 см өндөртэй. Биеийн харьцаа 90:62:92.

-Энэ харьцааг барихын тулд ямар дэглэм баримталдаг вэ?

-Миний хувьд хоолны дэглэм барих тал дээр нэг их анхаардаггүй. Өөрийнхөө идэхийг хүссэн зүйлээ иддэг. Жингээ барихын тулд өглөө босоод 100 удаа дээс үсрээд, хүйтэн, халуун устай шүршүүрт ордог. Мөн Speed Fit гээд фитнесст явж байгаа. Энэ маш үр дүнтэй биеийг маань маш гоё чангалж өгдөг.

-Их ажлынхаа хажуугаар зав гарган ярилцлага өгсөнд баярлалаа. Амжилт хүсье. Эх орныхоо нэрийг өндөрт өргөөд ирээрэй.

Т.Болор


 

Н.Ану: Монголд анх удаа уруулаараа үнсэж зурсан зургаар үзэсгэлэн гаргаж байгаа


Шинэ мэдээ

Холбоотой мэдээ

Сэтгэгдэл үлдээх

АНХААРУУЛГА: Уншигчдын бичсэн сэтгэгдэлд www.Tonshuul.mn хариуцлага хүлээхгүй болно.

Сэтгэгдэл байхгүй байна.