Монгол Улс 2015 оны хагас жилийн байдлаар 700 гаруй мянган тээврийн хэрэгсэлтэй, үүний 450 мянга нь нийслэлд бүртгэлтэй бөгөөд 400 мянга нь албан журмын татвараа төлсөн мэдээлэл байна. Жолооч нарын татварт төлсөн мөнгөөр авто зогсоол нэмж барих, авто замын эвдрэлийг бууруулах учиртай ч үнэндээ өнөөдөр зургаан журмын хашаа нэмж байгуулсан амжилтаар 2015 оныг үдэж байгаа бололтой. 

Зогсоолгүй нийслэлд автомашинтай иргэдийг чангалах, торгох, халаасыг нь суйлах луйвар бишгүй олон байгаагийн нэг нь машин ачилт. Төсөвт нэг ч төгрөг өгдөггүй машин ачилтын компаниудын тоо өнөөдрийн байдлаар 11-д хүрч, нийт есөн журмын хашаанд ачсан машинуудаа байрлуулж байна. Ганцхан журмын хашаанд л гэхэд хоногтоо 100-130 машин эргэлддэг аж. Үүнээс улбаалан гуравхан журмын хашаатай байсан нийслэлд өнөөдөр есөн журмын хашаа үйл ажиллагаа явуулж, тэнд хүн биш "шуналын тулам”-нууд суучихсан, машинаа илүү хонуулсан хоног тутамд жолооч нараас 5000 төгрөг сааж сууна. 

Мөн ачилтын компаниуд иргэдийн машиныг маш ихээр гэмтээж байгаа гэх мэдээлэл ч бий. Хэрвээ тэд ачилтынхаа явцад иргэний машинд хохирол учруулсан бол 100 хувь нөхөн төлбөр өгөх ёстой юм байна. Гэвч мах шүүрдэг бүргэд шиг аашлах ачилтын компаниуд улсад нэг ч төгрөг төлөхгүйгээр ийнхүү ашиг олж байгаа юм. Харин жолооч нарын хувьд журмын хашаа байгуулахын оронд зогсоол нэмж байгуулмаар байгааг хэлэв. Эх сурвалжwww.wikimon.mn