"Тулгарах бэрхшээлийг хамтдаа тодорхойлж, туулах гарцыг хамтдаа эрэлхийлье” уриатай зохион байгуулагдаж байгаа "Бид хамтдаа” үндэсний форум хоёр дахь өдрөө үргэлжилж байна.

"Бид хамтдаа” үндэсний форумын салбар хуралдаан "Дэд бүтцийн салбарын тулгамдсан асуудал, шийдвэрлэх арга зам” сэдэвт хэлэлцүүлэг Тусгаар тогтнолын ордонд болов. Уг салбар хуралдаанд Барилга, хот байгуулалтын сайд асан Д.Цогтбаатар "Барилга, хот байгуулалт, дахин төлөвлөлтийн зарим асуудлууд”, Зам тээвэр, барилга хот байгуулалтын яамны Төрийн нарийн бичгийн дарга асан Ж.Бат-Эрдэнэ "Зам, тээврийн салбарын тулгамдсан асуудлууд, шийдвэрлэх арга зам”, Эрчим хүчний яамны газрын дарга асан Ч.Саранжав "Эрчим хүчний салбарын өнөөгийн байдал, тулгамдсан асуудлуудыг шийдвэрлэх арга зам” сэдвээр тус тус илтгэл тавилаа.  

Хуралдаанаар эрчим хүч, зам харилцаа, барилга байгуулалт, хот төлөвлөлтийн талаар хэлэлцэн эдгээр нь улс орны эдийн засгийн хөгжлийн суурь ойлголт юм гэж дүгнээд тэдгээрийг шийдвэрлэх арга замыг тодорхойлох талаар эрдэм судлаачидтай хэлэлцүүлэг явуулав.

Салбар хуралдаанаар улс төр, эдийн засгийн тогтвортой байдал шаардлагатай, яам, агентлаг, төрийн өмчит байгууллагуудыг бүтцийн өөрчлөлтөд байнга хамруулахгүй тогтвортой ажилуулах нөхцлөөр хангах, салбарын мэдлэг, туршлагатай тэргүүний боловсон хүчнийг тогтвор сууршилтай ажилуулах, хувь хүний үзэл, бодлоор бус салбарыг хөгжүүлэх төрийн бодлого өөрчлөгддөггүй байх нь чухал гэж эрдэмтэн судлаачид үзлээ.

МАН-аас зохион байгуулж байгаа "Бид хамтдаа” форумд салбар салбарын эрдэмтэн мэргэд судлаачид ам сайтай цаг үеэ олсон форум болж байна гэж дүгнэлээ.