Тулгарах бэрхшээлийг хамтаа тодорхойлж, туулах гарцыг хамтдаа эрэлхийлэхээр цугласан "Бид хамтдаа” форум хоёр дахь өдрөө үргэлжиллээ.  Асуудлыг салбар бүрээр нь салган хэлэлцэхээр улс төрийн намын төлөөллүүд, эрдэмтэн, судлаачид, иргэд Тусгаар тогтнолын ордонд чуулсан юм.  Тухайлбал, тус ордны зургаан давхарт "Банк санхүүгийн салбарын тулгамдсан асуудал шийдвэрлэх арга зам” сэдвийн хүрээнд банкны салбарынхан болон эдийн засагчид оролцож, байр сууриа илэрхийлж, нөхцөл байдлаа дүгнэж, гарах гарцаа эрэлхийллээ.

Төрийн бодлого, буруу шийдвэрийн хар гайгаар хөрөнгө оруулагчид үргэж, гадныхан дайжих болсон талаар УИХ-ын гишүүн Д.Хаянхярваа онцолсон. Түүний хэлж байгаагаар олон жил хүчин төгөлдөр мөрдөж байсан Хөрөнгө оруулалтын тухай хуульд гар дүрсэн нь өнөөгийн нөхцөл байдлыг хүндрүүлэхэд хүргэсэн гэсэн юм. Улмаар төсөв тасалдаж, энэ жилийн тухайд л гэхэд гурав дахиа тодотгож байна. Ирэх жил ч он гараад тодотгол хийж мэдэхээр байгааг дурьдсан. 2008-2012 онд 550 сая ам.долларын зээл авч, үүнийгээ Хүний хөгжлийн сангаар дамжуулж иргэдэд тараасан бол 2012 оноос хойш 2.8 тэрбум ам.долларын өр тавьжээ. Монгол Улс олон жилийн түүхтэй их өрийг тэглэсэндээ баярлаж, энэ гавьяаг өдгөө ч дуурсдаг. Гэтэл маш богино хугацаанд түүнээс дутахааргүй өр үүсгэсэн ялыг асуух цаг ирснийг ч тэрбээр хэлсэн. 2016 онд Монгол Улс зөвхөн зээлийн үйлчилгээний зардалд 962.4 тэрбум төгрөг төлнө. Эдийн засагт улаан гэрэл асахад хариуцлагагүйн зуд, эрх баригчдын буруу бодлого, шийдвэр нөлөөлсөн гэдэгтэй эдийн засагчид ч санал нэг байсан юм.

Өдгөө банкууд зээл гаргаж чадахаа больж, эрсдэлд оржээ. Засгийн газрын гурван их наяд төгрөгийн бондыг хүртэл банкууд аваад "түгжчихсэн” тухай эдийн засагчид онцолсон. Монголбанк өнгөрсөн хугацаанд Үнэ тогтворжуулах хөтөлбөрт зориулж дөрвөн их наяд төгрөг зарцуулсан ч 70 хувь нь эргэн төлөгдөөгүй гэх албан бус мэдээлэл бий. Юутай ч өдгөө валютын нөөц шавхагдаж, иргэдийн хадгаламж буурсан. Дээр нь манай банкуудын өрсөлдөх чадвар сул байдгийг хэлэлцүүлэгт оролцогчид хэлж байлаа. Хатуухан хэлэхэд, Монгол Улсын банкуудыг гадны улс орнуудтай харьцуулахад онигоо болохоор гэнэ.