Монгол улс 20 тонн гахайн махаар “шатав”
Польшоос Монгол руу тээвэрлэж явсан 20 тонн хөлдүү гахайн махыг Беларусийн Гомель хотоор дамжуулан ОХУ-ын хилээр нэвтрүүлэх гэж байсныг ОХУ-ын мэргэжлийн хяналтын газар саатуулан хураасан талаар тус байгууллагын хэвлэлийн төлөөлөгч мэдээлжээ. Польш улсын Мал эмнэлэг, хорио цээрийн албаны сертификаттай уг ачаа Монголын "ХКҮ” компанийн нэр дээр тээвэрлэгдэж явсан хэмээн албаны хүн хэлсэн байна. ОХУ Барууны орнуудаас импортлодог бараандаа хориг тавьсан 2014 оны наймдугаар сараас хойш Беларусь улс тэдгээр улсаас бараа оруулж ирэх нь эрс ихэссэн бөгөөд тэдгээрийн нэлээдийг Орос болон Беларусийн компаниуд транзит ачаа нэрээр Оросын нутаг руу оруулаад тэнд нь шингээдэг болсон юм. Ингэснээр гуравдагч орны импортлож буй барааг Беларусийн нутагтай залгаа хилийн боомтоороо оруулахыг Оросын тал хориглоод удаагүй байгаа ажээ. Ийм хоригийн улмаас Монгол руу явж байсан гэх гахайн мах хил дээр саатуулагдсан бөгөөд уг ачааг илгээгч рүү нь буцаана хэмээн албаны хүн хэлсэн байна.
Л.Амгалан