Тэрээр ялсан намын дарга учраас 2012 оны долдугаар сард Монгол Улсын Ерөнхий сайдаар тодорсон. Энэ даруй Н.Алтанхуяг "Шинэчлэлийн” хэмээх Засгийн газар байгуулж, хоёр жилийн хугацаанд ажиллаад засагт хамтрагч МАХН-ын дарга Н.Энхбаяртай гэрээ байгуулсан гэх үндэслэлээр огцорсон. Н.Алтанхуягийг огцроход сөрөг хүчин ч чамгүй үүрэг гүйцэтгэж, сөрөг хүчний санаачилгаар УИХ-ын дарга З.Энхболд, Ч.Сайханбилэг нарын ташуураар тэр огцорсон. МАН, АН хоёрын тохиролцоо ч байсан гэдэг. Тодруулбал, УИХ-ын гишүүн Д.Хаянхярваа нарын нэр бүхий 28 гишүүний өргөн барьсан Монгол Улсын Ерөнхий сайдыг огцруулах тухай саналыг хэлэлцэхэд нийт гишүүдийн 54.5 хувь буюу олонхийн саналаар түүнийг огцруулах шийдвэр гаргасан юм. Ийнхүү тэрээр 2014 оны 11 дүгээр сарын 5-ны өдөр огцорсон юм. Эх сурвалжийн хэлж байгаагаар Н.Алтанхуяг нь "Алтангадас” фракциа толгойлдог бөгөөд өдгөө фракциа аврах, намын толгойд гарах ажиллагааг далд хэлбэрт зохион байгуулж байна хэмээсэн. Нөгөө талаар фракцийнх нь нөлөө бүхий нөхдүүдийг хүчний байгууллагаас шалгаж, заримыг нь хориод хүртэл авсан. Тиймээс түүнд фракциа аварч, намын толгойд гарахаас өөр ямар ч гарц үлдээгүй.