Өнгөрсөн оны арванхоёрдугаар сард арилжааны банкууд нийт 843 зээлдэгчид 46.8 тэрбум төгрөгийн ипотекийн зээл шинээр олгожээ. Ипотекийн зээлийн нийт үлдэгдэл 2015 оны эцэст 3.4 их наяд төгрөгтэй тэнцэж, зээлдэгчдийн тоо 77 мянга болжээ. Монголбанкнаас мэдээлснээр нэг зээлдэгчид ногдох дундаж зээлийн хэмжээ 55.6 сая төгрөг байгаа юм. Өнгөрсөн хугацаанд олгосон ипотекийн зээлийн үлдэгдлийн 77 хувийг Улаанбаатар хотод, 23 хувийг хөдөө орон нутагт олгожээ. Өнгөрсөн оны 12 дугаар сарын 10-аас арилжааны банкууд ипотекийн зээлээ түр зогсоох шийдвэр гаргасантай холбогдуулан ипотекийн зээл 11 дүгээр сараас 32.3 хувиар буурсан гэж Монголбанк мэдээллээ. Харин энэ сарын 19-нд УИХ "Иргэний тухай хуульд нэмэлт оруулах”, "Үл хөдлөх хөрөнгийн барьцааны тухай хуульд өөрчлөлт оруулах” тухай хуулийг баталснаар ипотекийн зээл хэвийн олгох нөхцөл бүрдээд байна.

Т.Гэрэл