УИХ-ын гишүүн, Хуульзүйн байнгын хорооны дарга Д.Ганбат Баянхонгор аймгийн сонгогчдодоо бидон тараажээ. Тэр нутгийнхнаа хуванцар савнаас үүсдэг хорт хавдраас сэргийлэхийн тулд Алдарт эхийн I, II одонг дагалдуулж, бидон тарааснаа хэвлэлд учирласан. Үнэндээ бидон тараасан нь бол хуучирсан мэдээ. Харин шинэ мэдээ нь эрхэм гишүүн өөрийн бус төсвийн мөнгөөр бидон авч, сонгогчдодоо тараажээ.

Тэрбээр Чингэлтэй дүүргийн гишүүн Г.Баярсайхантай нийлж, төсөл хэрэгжүүлсэн байна. Тэр төсөл нь Баянхонгор аймаг болон Чингэлтэй дүүрэгт ажлын байр шинээр бий болгож, өрхийн орлогыг нэмэгдүүлэх зорилготой. Мөн сонгогчдын амьдрах орчныг сайжруулах зорилгыг ч мартаагүй. Энэ бүх зорилгын үүднээс иргэдэд 20-40 литрын багтаамжтай төмөр бидон тараасан гэнэ. Баянхонгор аймаг, Чингэлтэй дүүргийн нэг өрхөд нэг бидон тараагаад ажлын байр нэмэгдэж, иргэдийн орлого нэмэгдсэн нь юу л бол. Бас бидоны ачаар амьдрах орчин сайжирсан гэдэгт ч эргэлзэж байна.

Одоо хамгийн чухал нь, бидоны санхүүжилт нь нэг тэрбум төгрөг. Хөдөлмөр эрхлэлтийн үйлчилгээний төвийн захирал С.Чойноров тушаал гаргаж, хөдөлмөрийн салбарын төвлөрсөн хөрөнгөөс нэг тэрбум төгрөгийн санхүүжилтийг Д.Ганбат, Г.Баярсайхан нарт өгчээ. Тэгэхээр Д.Ганбат, Г.Баярсайхан нар нэг тэрбум төгрөгийн өртөгтэй бидоныг Чингэлтэй дүүрэг болон Баянхонгор аймгийн иргэдэд тараасан уу гэсэн асуулт урган гарна.

Д.Ганбат гишүүн бол бидоныг дуулиан шуугиантай тараасан. Харин сэмээрхэн тараалт хийсэн хүн нь Г.Баярсайхан. Эрхэм гишүүн дүүргийнхээ сонгогчидтой уулзахаар зар тараасан ч иргэд цуглаагүй гэнэ. Тиймээс зарандаа "бидон тараана” гэсэн нэмэгдэл хийж, "ирц” бүрдүүлсэн гэх мэдээлэл цахим хуудсанд байна. Хэлсэн ёсоороо бидоноо ч тарааж, иргэд нь их л сэтгэл хангалуун буцсан тухай мэдээнд дурджээ.

Г.Баярсайхан гишүүн бидон тараасан тухайгаа ам ангайгаагүй. Мөн Д.Ганбат хэдэн өрхөд хичнээн бидон тарааснаа тодорхой хэлээгүй. Тэд төсвийн сангаас авсан нэг тэрбум төгрөгөө бүгдийг нь сав суулганд зарцуулаагүй нь ойлгомжтой. Тэгэхээр тэрбум төгрөгийн "хөөрхөн” хувь нь гишүүдийн  хувийн хэтэвчинд орсон байж болзошгүй. Учир нь тэд хөдөлмөрийн салбарын төвлөрсөн хөрөнгөөс авсан нэг тэрбум төгрөгөө хэрхэн зарцуулсан тухайгаа тайлагнаагүй. Төсвийн хөрөнгөөр хийсэн бүх ажил ил тод нээлттэй, зарцуулалт нь тодорхой байх хуультай. Гэхдээ энэ асуудлыг хуулийнхан шалгаж, нягтлах сураг бий. Өөрөөр хэлбэл, Г.Баярсайхан, Д.Ганбат нар төсвийн нэг тэрбум төгрөгөөр төмөр бидон авч, сонгогчдодоо тараасан уу эсвэл хувьдаа завшсан уу гэдгийг хуулийнхан тодорхой болгохоор ажиллаж эхэлжээ.

Өөр нэг асуудал нь Д.Ганбат, Г.Баярсайхан нарын төслийг хэрэгжүүлэгчдийг сонгон шалгаруулаагүй. Төсвийн нэг тэрбум төгрөгөөр ажил гүйцэтгэгчдийг сонгож шалгаагүй гэсэн үг.Харин УИХ-ын гишүүн Д.Ганбатын санал болгосон "Өсөх үе”,  "Ти Ай Ложистик”, "Мебат”, "Хан Теч” ХХК, "Техник импорт” ХК-тай шууд гэрээ байгуулан, хэрэгжүүлсэн нь эрх мэдлээр далайлгасны илрэл бололтой. Дээр нь хэрэгжүүлэгч нар нь ямар нэг асуудал үүсгэвэл Д.Ганбат гишүүн өөрийн биеэр бүрэн хариуцана гэдгээ Хөдөлмөр эрхлэлтийн үйлчилгээний төвийн удирдлагад албан бичгээр илэрхийлсэн байна.

Тэгэхээр УИХ-ын гишүүн Г.Баярсайхан, Д.Ганбат нарын сонгогчдынхоо эрүүл мэндийг бодож, ажлын байр бий болгож, өрхийн орлогыг нэмэгдүүлэх гэж тараасан бидоны ард цөөнгүй "но” байж мэдэх нь. Хамгийн наад зах нь төсвийн мөнгийг зориулалтын бус зарцуулсан, эрх мэдлээ хэтрүүлсэн гэхчлэнгээр хууль бус үйлдлийн сэжүүр харагдаж байна. Энэ бүхэн хуульд нийцэх, үл нийцэхийг хууль хяналтынхан тун удахгүй тогтооно.

УИХ-ын гишүүд ажлын байр бий болгож, иргэдийн орлогыг нэмэгдүүлэх гэж бидон тараасан нь үнэндээ бол инээдтэй хэрэг. Г.Баярсайхан, Д.Ганбат нарын бидон иргэдийг ажилтай, мөнгөтэй, эрүүл болгоно гэдэг ёстой л нөгөө "лөлө” биз дээ. Иргэд сонгогчоо бодсон төрийн түшээ бус төсвийн мөнгөөс идсэн ядруу сэтгэлгээтэй хумслагчид л харагдаж байна.

В.Хэрлэн

Эх сурвалж: Шууд.мн