Хөрш зэргэлдээ Хятад, Орос, Казахстан зэрэг улсад Монголын түүхийг гуйвуулж бичдэг талаар эрдэмтэд хэлж байна. Тухайлбал, 1944 онд Зөвлөлт холбоот улсын Коммунист намын тогтоол гарч, Алтан Ордны улсын түүхэнд гүйцэтгэсэн үүргийн талаар дүгнэсэн байдаг.  Энэ тогтоолд Алтан Ордны улс хамгийн харгис улс байсан, Монголчууд Оросын түүхэн хөгжлийг олон жилээр саатуулан, ухраасан гэж үзсэн байдаг байна.

 

Иймд түүхчид Алтан Ордны улс болон Монголын эзэнт гүрний түүхийн талаар бичихдээ энэ тогтоолын дагуу бичих үүрэгтэй болж, Алтан Ордны улс нь  Оросын хөгжлийг 200-300 жилээр хойш татсан гэдэг түүхийн гуйвуулгыг бүхий л шатны сурах бичгүүддээ хэрэглэдэг болсон байна.  Харин ОХУ-ын Ерөнхийлөгч В.Путин зарлиг гарган, бүх дунд болон их, дээд сургуульд ашигладаг, түүхийн сурах бичгүүд дэх Татар Монголчуудын талаарх ойлголт, Татар Монголын дарлал болон ер нь Оросын түүхэнд Монголчуудын гүйцэтгэсэн үүргийг бодитоор үнэлэх ёстой гэж үзсэн байна.

Тиймээс сурах бичгийн шинэ стандарт боловсруулах үүргийг 2013 онд өгч, 2016 оны шинэ хичээлийн жилээс шинэ сурах бичгийг ашиглана гэсэн мэдээллийг ШУА-ийн Түүх археологийн хүрээлэнгийн эрдэмтэн, доктор, дэд профессор н.Энхчимэг бидэнд өглөө. Ингэснээр Алтан Ордны улсын Оросын түүхэнд гүйцэтгэсэн үүргийг үнэн бодитоор үнэлэх юм. Энэ талаарх дэлгэрэнгүй мэдээллийг хүргэе.