Айл болгон шахуу wifi төхөөрөмжтэй болж, гэртээ байгаа үедээ интернэтийн ашиг тусаар элдэв мэдээллээс хоцрохгүй болсон. Хэрэгтэй мэдээллээ авчихаад гар утас, компьютерээсээ холдож чадахгүй үргэлжлүүлэн сууж, хүзүүгээ чилтэл бөхийж хэдэн цагаар ч хамаагүй гөлөрчихдөг. Үүнээс л үүдэж гэрт бөөн ам зөрөлдөнө.

Гар утас, интернэт рүү хамаг бурууг чихэж, хөгжил гэдэг чинь хөгийн юм гэцгээдэг. Уг нь хүн гэртээ байх хугацаандаа гэр бүлийнхэнтэйгээ цагийг үр бүтээлтэй, аз жаргалтай өнгөрөөж бусдадаа анхаарал хандуулж байвал болоод явчихна. Ханийнхаа гарыг, үрийнхээ өхөөрдөм хацрыг илбэх гар тань гар утас л "илээд”, "тэврээд” байгаа гэсэн үг. Хүүхдүүд гэртээ дүрэм тогтоож, гэрийн ажлаа нарийн хуваарилж хэн хэн юу хийх, гэрийн дотоод журмыг мөрдөхгүй бол яах тухай ч заах дуртай. 8-13 насны сурагчид гэртээ дүрэм тогтоохдоо "Аав, ээж ер нь хэн ч бай гэртээ интернэт ашиглахгүй.

 Зайлшгүй шаардлага гарвал 30 минутаас илүүгүйгээр интернэтэд орж болно” гэсэн гэр бүлийн дүрэм зохиосноо багшдаа ярьжээ. Энэ бол хүүхдүүдийн хувьд сэтгэлийг нь эмзэглүүлсэн сэдэв болж таарч байгаа юм. Тийм болохоор үр хүүхэд тань гар утас, интернэтийн хэрэглээтэй холбоотой ийм дүрэм гаргаж ирвэл гайхаж ундууцалгүй хүлээж аваарай. Бидний хувьд гар утастай "ноцолдох” нь дэндээд байгаа болохоор л үр хүүхдүүд маань хориг тавьж эхэлж байна. Энэ нь ч зөв л дөө.

Эх сурвалж: www.dnn.mn