Spice Girls нэг жилийн дараа эргэж нэгдэнэ
Тэд хэтэрхий яарчээ. Эргэн нэгдэж, дэлхийг тойрсон аялан тоглолт хийхээр болсон хэмээн зар тараасан Spice Girls хамтлагийн гишүүд эхлээд зохион байгуулалтын асуудлаа шийдээд, дараа нь шуугиан тарьсан мэдэгдэл гаргах байсан юм. Тэд анхны цомгоо гаргасны 20 жилийн ойд зориулсан аялан тоглолтоо нэг жилээр хойшлуулсан байна.
"Энэ жил бол манай хамтлагийн хувьд ойн жил юм. Аялан тоглолтоо яг одоо эхлүүлсэн бол их сайхан болох байсан. Гэвч бидний тоглохыг хүссэн концертын танхимууд бүгд захиалгатай, эзэнтэй болсон байна. Тийм учраас бид нар аялан тоглолтоо хойшлуулахад хүрэв. Нас яваад байдаг. Бид яаравчлах хэрэгтэй болов уу” хэмээн хамтлагийн гишүүн Мэл Би хэлжээ.
Тэдний эргэн нэгдэлт чухам хэзээ болохыг тэрбээр хэлсэнгүй. Энэ оны долоодугаар сарын 08-ны өдөр бүх цаг үеийн хамгийн алдартай охидын хамтлаг болох Spice Girls-ын 20 жилийн ой болох билээ. 1996 онд тэдний анхны цомог болох Wannabe гарсан юм.