Тулгар төрийн 2225, Их Монгол Улсын 810, Үндэсний эрх чөлөөний 105, Ардын хувьсгалын 95 жилийн ойн баяр наадам өргөн дэлгэр сайхан болж өндөрлөлөө.

 

Хоёр өдөр, шөнө дэнж хотойтол хотлоороо наадсан Монгол  түмэн шинэ аварга, арслан, гарьд, заан, харцага, начин цолтонгууд, мөн шинэ улсын мэргэн сурчид, шагай харваачид болон хурдан ажнай хүлэг морьдоо тодруулан баяслаа.

Үндэсний их баяр наадмыг хааж Монгол Улсын Ерөнхийлөгч Ц.Элбэгдорж "Эрхэм хүндэт наадамчид аа, Хүндэт зочид оо, Эртний түүхтэй Монгол түмний их баяр наадам маань ёслол төгөдөр сайхан болж, бахархлыг бадраан, золбоо хийморийг өргөлөө. Эр бяр тэгширсэн хүчтэн, ур ухаан бүрдсэн харваач, эрдэм билгүүн жагссан олон уяач шинээр тодрон гарлаа. Цэнгэл баярын тэргүүнд заларсан та бүхэндээ баяр хүргэж, хамгийн сайн сайхныг хүсэн ерөөе. Монгол наадам - Монгол үндэстний агуу их түүхийг сануулж, тусгаар тогтнол, эрх чөлөөгөө эрхэмлэн дээдэлж, улам ихийг хийж бүтээх урам зоригийг хайрлалаа. Монгол наадмаас монгол соёл хэчнээн утга төгөлдөр, агуулга гүнзгий вэ гэдгийг баясан харлаа. Эрдэм ухаан, эв нэгдэл, эр чадлын чуулган болсон Монгол наадам - Монгол соёлыг бүтээсэн үндэстэн агуу түүхтэй шигээ агуу ирээдүйтэй билээ. Ирээдүйн сайн сайхныг цогцлоохын төлөө шударга ёс, эвийн хүчийг эрхэмлэн, эрх чөлөө, үүрэг хариуцлагыг ухамсарлаж дор бүрнээ хичээн зүтгэцгээе. Монгол түмний түүх соёл, цэнгэл жаргалын манлай үндэсний их баяр наадам маань үеийн үед улам өргөн дэлгэр болж байхын өлзийтэй ерөөл өргөн энэ жилийн наадам өндөрлөж байгааг уламжилъя. Төр улс минь түвшин гэгээн, түмэн олон минь амгалан жаргалтай байг ээ" гэлээ.

Ийнхүү есөн хөлт цагаан тугийг Төв цэнгэлдэх хүрээлэнгийн баяр наадмын ногоон дэвжээнээс Төрийн ордон руу залах ёслол эхэлж, Монгол наадам дурсамж дүүрэн өндөрлөлөө.