Өнөөдөр баруун аймгуудын нутгаар хур тунадастай, харин маргааш баруун болон төвийн аймгуудын ихэнх нутгаар дуу цахилгаантай бороо орох төлөвтэй байна. Ойрын өдрүүдэд бороо хур орох төлөвтэй тул иргэдэд анхааруулгыг Онцгой байдлын ерөнхий газраас хүргүүлж байна.

 

Түүнчлэн иргэдийн хайхрамж, болгоомжгүй байдлаас шалтгаалан 2016 он гарсаар 17 аймгийн 29 сум, нийслэлийн 4 дүүрэгт усанд осолдсон дуудлага нийт 53 удаа гарч 63 хүн (хүүхэд-22, насанд хүрэгсэд-41), аадар бороо орж, уруу буусны улмаас Баян-Өлгий аймгийн Өлгий сум, Орхон аймгийн Баян-Өндөр суманд 4-11 насны 3 хүүхэд амь насаа алдсан харамсалтай тохиолдлууд гарчээ.

Иймээс тээврийн хэрэгслийн жолооч нар баталгаатай гүүрээр зорчих, байгууллага хамт олон, гэр бүл, найз нөхдөөрөө амралт, аялал, зугаалгаар явахдаа нэгдсэн зохион байгуулалттай, гол, мөрөн, нуурын эргээс зайдуу газар амрах, согтууруулах ундааг хэтрүүлэн хэрэглэхгүй байх, бага насны хүүхдийг хараа хяналттай байлгахыг анхаарууллаа.