Тээврийн хэрэгсэл дотор хүүхдийг зориулалтын суудалд, хамгаалах бүс бүслүүлэхгүйгээр эрсдэлтэй орчинд тээвэрлэж яваа жолооч нарт хатуу хариуцлага тооцно гэдгийг Замын цагдаагийн газраас мэдээллээ.

Өөрөөр хэлбэл Замын хөдөлгөөний аюулгүй байдлын тухай хуульд зааснаар 96 мянган төгрөгөөр торгох юм байна.

Замын цагдаагийн газраас хүүхэд багачуудыг зам тээврийн ослоос урьдчилан сэргийлэх үүднээс "Хамгаалах бүс, хамгаалалтын суудал” нэгдсэн арга хэмжээг зохион байгуулж байна.

Сургууль, цэцэрлэг амарч хүүхэд багачууд эцэг эхчүүдийн хараа хяналтад шилжсэн энэ үед зам тээврийн ослын улмаас бага насны хүүхэд хохирогч болох нь өдрөөс өдөрт нэмэгдэж байгаа аж.

Оны эхний хагас жилийн байдлаар зам тээвэр ослын улмаас 19 хүүхэд нас барж, 554 хүүхэд багачууд бэртэж гэмтсэн байна. Ослын шалтгаан нь:
Хүүхдийг хараа хяналтгүй замын хөдөлгөөнд оролцуулдаг. Хүүхдийг гудамж зам, гэр сургуулийн ойр орчин, тоглоомын талбайд тоглуулахдаа хараа хяналт тавьдаггүй. Буруу үлгэр дуурайл үзүүлдэг. Тээврийн хэрэгслээр буруу тээвэрлэдэг хамгаалалтын суудал болон хамгаалалтын бүс ашигладаггүй зэрэг болно. Зам тээврийн ослын улмаас бэртэж, улмаар амиа алдсан хүүхдийн дийлэнх нь тээврийн хэрэгслээр хамгаалалтгүй зорчиж байжээ. Эцэг эх, асран хамгаалагчид өөрсдөө хамгаалалтын бүсээ зүүдэг хир нь бага насны хүүхдийн хамгаалалтын бүсгүй зорчуулдаг. Зарим тохиолдолд цонхоор толгой, чээжээ гаргаж явснаас үүдэн шидэгдэх тохиолдол ч гардаг байна. Тиймээс энэ мэт байдлыг таслан зогсоох үүднээс долдугаар сарын 25-наас сарын хугацаатай аяныг зохион байгуулж байна. Ингэснээр эцэг эх, асран хамгаалагчид хүүхдээ хамгаалалтын бүс, суудалд суулгаж хэвшихэд тусална гэж найдаж байгаа аж.